घरेलु टोली नेपाललाई हराउँदै त्रिदेशीय टी–२० क्रिकेट श्रृंखलाकाे उपाधि जितेपछि नेदरल्यान्ड्सका खेलाडीले नेपाली राष्ट्रिय झण्डा ओढेका छन् ।

मंगलवार कीर्तिपुरस्थित त्रिवि मैदानमा फाइनल खेल सकिएपछि उनीहरूले नेपाली खेलाडीको सम्मानमा नेपालको राष्ट्रिय झण्डा काँधमा राखेका हुन् ।

नेपाली समर्थकले आफ्नो टोलीलाई हराएर उपाधि जितेका नेदरल्यान्ड्सका खेलाडीकाे सम्मानमा ताजी बजाएका थिए । यसको जवाफमा नेदरल्यान्ड्सका खेलाडीले नेपालीलाई ‘दयालु'को संज्ञा दिएका थिए ।

मंगलवार भएको खेलमा नेदरल्यान्ड्सले नेपाललाई ४ विकेटले हराएर उपाधि जितेको हो ।

यसअघि ३ देश सम्मिलित शृंखलामा शीर्ष २ स्थानमा रहँदै दुवै टोलीले उपाधि भिडन्त पक्का गरेका थिए । 

लिग चरणमा नेपालले नेदरल्यान्ड्स र नामिबियासँगका शुरूवाती २ खेल गुमाउँदा पछिल्ला २ खेलमा भने जीत निकालेको थियो । नेपाल पहिलो खेलमा नामिबियासँग २० रन र दोस्रो खेलमा नेदरल्यान्ड्ससँग २ रनले हारेको थियो ।

तर आफ्नो तेस्रो खेलमा नेपालले नामिबियालाई ३ रन र चौथोमा नेदरल्यान्ड्सलाई ६ विकेटले हराउँदै फाइनलमा स्थान पक्का गरेको थियो ।

घरेलु टोली नेपाललाई हराउँदै नेदरल्यान्ड्सले जित्यो त्रिदेशीय टी–२० श्रृंखला