सर्वोच्च अदालतले आफ्नै नजिर बिर्सेर समान प्रकृतिको मुद्दामा फरक आदेश गरेको भन्दै न्यायाधीशको आचरणबारे छानबिन गर्न संसदीय छानबिन समिति गठनको माग उठेको छ । आइतवार बसेको प्रतिनिधिसभा बैठकको आकस्मिक समयमा स्वतन्त्र सांसद डा अमरेशकुमार सिंहले न्यायाधीशको आचरणबारे छानबिन गर्न संसदीय समितिको माग गरेका हुन् । 

‘कार्यपालिकाको कामलाई लिएर विश्वासको खडेरी भइरहेको समयमा न्यापालिकाबाट त्यस्तै विवादस्पद निर्णय हुन थालेका छन् । न्यापालिकाबाट के आधारणमा निर्णय भएको छ, यसबारे न्यायाधीशको आचरण छानबिन गर्न संसदीय समिति बनाउन माग गर्छु,’ उनले भने, ‘न्यायालयमा ठूल–ठूला मुद्दा प्रभावित भइरहेको छ कि ! समान मुद्दामा फरक फर निर्णय आइरहेको छ । सर्वोच्चले आफ्नो नजिर आफैँ खण्डन गर्न खोजिरहेको छ ।’ 

कमजोर न्यायाधीश कारबाहीको भागिदार बनेपनि सर्वोच्चका न्यायाधीशले उन्मुक्ति पाउने गरेको भन्दै उनले संसदीय छानबिन समितिको माग गरेका हुन् । 

‘न्यायपरिषद्मा पर्ने उजुरीको छिनोफानो हुँदैन । कानूनमन्त्री यही उपस्थित भएको समयमा माग गर्न चाहन्छु, न्याय निरुपण र न्यायाधीशको आचरणबारे छानबिन सर्ग संसदीय छानबिन समिति गठन गरियोस्,’ सांसद सिंहले भने । 

पछिल्लो पटक भ्रष्टाचार मुद्दामा निलम्बनमा परेका नेपाली कांग्रेसका सांसद टेकबहादुर गुरुङलाई संसद्मा उपस्थित गराउन दिन सर्वोच्चको संयुक्त इजलासबाट भएको आदेशको चौतर्फी आलोचना भइरहेको छ ।