सहकारीको पैसा हिनामिना गरेको आरोप लागेका उपप्रधान तथा गृहमन्त्री रवि लामिछानेप्रति प्रमुख प्रतिपक्षी दल नेपाली कांग्रेस सांसदहरूले कटाक्ष गरेका छन् । आइतवार बसेको प्रतिनिधिसभा बैठकको शून्य समयमा कांग्रेस सांसद शान्ति विकले अपराधमा छानबिन गर्ने गृहमन्त्री नै अपराधमा संलग्न रहेको आरोप लगाइन् । 

‘नेपालले शक्तिशाली माछा उत्पादन गरेको रहेछ । किलोका किलोको सुन पचाउने, सहकारीमा ज्याला मजदुरी गरेको रकम पनि माछाले निल्न छाडेन,’ उनले भनिन्, ‘अहिले बजार हल्ला छ– कांग्रेसले प्रधानमन्त्री अफर गर्यो रे ! केन्द्रीय समितिबाट हो कि प्रदाधिकारीबाट निर्णय भएको होला ?’ 

कांग्रेसकै सांसद सीता मीजारले गृहमन्त्रीमाथि लागेको आरोपमा उन्मुक्ति दिन खोजिएको भन्दै प्रश्न गरिन्–‘सहकारी ठगी प्रकरणमा जीबी राई कहिले पक्राउ पर्छन् ? गृहमन्त्रीमाथि लागेको आरोपबारे छानबिनको दायरामा आउनु पर्दैन ?’