नेपाली कांग्रेस बागमती प्रदेशले बागमतीका मुख्यमन्त्री शालिकराम जम्कट्टेलको विपक्षमा मतदान गर्न निर्देशन दिएको छ ।

नेपाली कांग्रेस बागमती प्रदेश सभापति ईन्द्रबहादुर बानियाँको सभाध्यक्षतामा आइतवार काठमाडौंमा बसेको कार्यसम्पादन समितिको बैठकले यस्तो निर्देशन दिएको हो ।

सरकारलाई दिएको समर्थनसमेत फिर्ता लिएकोले विश्वासको मतको विपक्षमा मतदान गर्न संसदीय दललाई निर्देशन दिइएको कांग्रेस बागमतीका मुख्यसचिव राजु नेपालले जानकारी दिए ।

नेकपा माओवादी केन्द्र बागमती प्रदेश संसदीय दलका नेता जम्कट्टेललाई २०७९ माघ ३ गते विश्वासको मत दिएको कांग्रेसले २०८० फागुन २३ मा बागमती प्रदेश सरकारबाट राजीनामा दिई बाहिरिएको थियो ।

बागमती प्रदेश सभामा मुख्यमन्त्री जम्कट्टेलले चैत १९ गते (भोलि) विश्वासको मत लिने कार्यक्रम छ ।

नेपालको संविधानको धारा १८८ को उपधारा (२) अनुसार प्रदेश सरकारमा सहभागी दलले आफ्नो समर्थन फिर्ता लिएमा मुख्यमन्त्रीले ३० दिनभित्र विश्वासको मत लिनुपर्ने व्यवस्था छ ।

बागमतीको १ सय १० सदस्यीय प्रदेशसभामा जम्कट्टेलले ५६ मत जुटाएमा उनी मुख्यमन्त्रीमा कायम रहनेछन् ।

बागमतीमा कांग्रेसको ३७, एमालेको २७, माओवादी केन्द्रको २१, राप्रपा १३, एकीकृत समाजवादीको ७, नेमकिपा ३ र हाम्रो नेपाली पार्टीको दुई सिट छ ।