महंगा घडी राखेको आरोपमा पेरूकी राष्ट्रपति डिना बोल्वार्टेको घरमा छापा हानिको उदाहरण सुनाउँदै नेमकिपा सांसद प्रेम सुवालले नेपालमा पनि प्रधानमन्त्री र मन्त्रीको घरमा छापा हान्नुपर्ने बताएका छन् ।

आइतवार प्रतिनिधि सभा बैठकको विशेष समयमा सुवालले इम्बोस्ट नम्बर प्लेट, बर्दघाट सुस्तापूर्वको चिस्यान केन्द्र र लोकमार्गको कालोपत्रे ६ महिना नपुग्दै उक्किएका समाचार संसद्‌मा सुनाउँदै निर्णय गरेका प्रधानमन्त्री र मन्त्रीको घरमा छापा हान्नुपर्ने बताएका हुन् ।

‘भ्रष्टाचारको अनुसन्धानका क्रममा पेरुका राष्ट्रपति बोल्वार्टेको घरमा शनिवार छापा हानिको समाचार आएको छ, विलासी घडी राखेको रिर्पोट आएपछि’, सुवालले संसद्‌मा भने, ‘अन्तशुल्कको स्टिकर, इम्बोस्ड नम्बर प्लेट लगायत अनियमिमता कुन-कुन प्रधामनन्त्री र मन्त्रीका कालामा भएका हुन् ? पेरूमा जस्तै हाम्रो देशका प्रधानमन्त्री र मन्त्रीको घरमा छापा मार्ने काम निक भएन ?

पेरूका राष्ट्रपति डिनाको घरमा स्रोत नखुलेका रोलेक्स लगायत १४ वटा घडी रहेको थाहा पाएपछि त्यहाको अनुसन्धान विभागले शनिवार छापा हानेको समाचार प्रकाशमा आएको थियो ।