उपप्रधान तथा परराष्ट्रमन्त्री नारायणकाजी श्रेष्ठले नेपालीहरूलाई निःशुल्क भिसा उपलब्ध गराउन चीन सकारात्मक रहेको बताएका छन् । एक साता लामो चीन भ्रमण पूरा गरी सोमबार काठमाडौं फर्किएका मन्त्री श्रेष्ठले चीन भ्रमण गर्न चाहने नेपालीलाई निःशुल्क भिसा उपलब्ध गराइदिन आफूले गरेको आग्रहमा चीनले सकारात्मक प्रतिक्रिया जनाएको बताए । 

'नेपाल भ्रमणमा आउने चिनियाँ पर्यटकहरूलाई नेपालले सन् २०१६ देखि नै निःशुल्क भिसा उपलब्ध गराउँदै आएको छ,' मन्त्री श्रेष्ठले भने, 'चीन भ्रमण गर्न चाहने नेपालीहरूलाई पनि चिनियाँ भिसा निःशुल्क उपलब्ध गराउन मैले अनुरोध गरेको छु । यसमा चिनियाँ पक्षले सकारात्मक प्रतिक्रिया दिएको छ ।'

उपप्रधानमन्त्री श्रेष्ठले परराष्ट्र मन्त्रीस्तरीय संयुक्त आयोग गठन गर्न चीन सकारात्मक भएको बताए । 'नेपाल-चीनबीच विद्यमान मैत्रीपूर्ण सम्बन्धका विविध आयामहरूमा नियमित रूपमा उच्चस्तरमा छलफल गर्न नेपाल र चीनका परराष्ट्र मन्त्रीस्तरमा एक संयुक्त आयोग गठन गर्न दुवै पक्ष सकारात्मक भएका छन्,' उनले जारी गरेको प्रेस नोटमा उल्लेख छ । 

साथै आफ्नो चीन भ्रमणले नेपाल र चीन बीचको आपसी सद्भाव, सम्मान र विश्वासलाई थप सुदृढ बनाउन तथा दुई मुलुकबीच विद्यमान ऐतिहासिक मित्रवत् सम्बन्धलाई अझ उचाइमा पुऱ्याउन महत्त्वपूर्ण भूमिका खेलेको विश्वास लिएको उनले बताएका छन् ।

उनले आफ्नो चीन भ्रमणका क्रममा चीनका परराष्ट्रमन्त्री वाङ यीलगायत अन्य विभिन्न नेताहरूसँग भेट भएको बताए । 'भेटमा मैले नेपाल-चीन सम्बन्धका विविध आयामहरूमा छलफल गरेको छु,' उनले भने । 

उनले जारी गरेको प्रेस नोटमा बेल्ट एण्ड रोड इनिसिएटिभ (बीआरआई) योजनालाई अन्तिम रूप दिई कार्यान्वयन गर्नेबारे छलफल भएको बताइएको छ ।