आलोपालोमा मुख्यमन्त्री पाउने सहमतिपछि नेकपा एकीकृत समाजवादीले नेकपा माओवादी केन्द्रको संसदीय दलका नेतासमेत रहेका बागमती प्रदेशका मुख्यमन्त्री शालिकराम जम्कट्टेललाई विश्वासको मत दिने भएको छ ।​

जम्कट्टेलले सोमवार प्रदेश सभामा विश्वासको मत लिँदैछन् ।

प्रधानमन्त्री निवास बालुवाटारमा सोमवार सत्ता गठबन्धनका शीर्ष नेताबीच आलोपालोमा नेकपा एसलाई पनि मुख्यमन्त्री दिने सहमति भएको थियो ।

बालुवाटारमा सहमति भएपछि बागमती प्रदेश सभामा नेकपा एस संसदीय दलका नेता कृष्णप्रसाद खनालले विश्वासको मत दिने निर्णय भएको बताएका छन् । बागमतीमा नेकपा एसका ७ जना सांसद छन् । 

७ मध्ये एक प्रदेशमा मुख्यमन्त्री नपाए बागमतीमा विश्वासको मत नदिने नेकपा एसले अडान राख्दै आएको थियो । नेकपा एसले तत्कालै सुदूरपश्चिममा मुख्यमन्त्री पाउने सहमति भएको दाबी गरेको छ ।

प्रधानमन्त्री पुष्पकमल दाहाल 'प्रचण्ड'ले नागरिक उन्मुक्ति पार्टीलाई पनि सुदूरपश्चिमको मुख्यमन्त्री दिने आश्वासन दिएका छन् । 

गठबन्धनबीच एक वर्ष जम्कट्टेलले नै सरकार चलाउने र बाँकी अवधिमा नेकपा एमाले र एसले मुख्यमन्त्री चलाउने सहमति भएको नेकपा एसका एक शीर्ष नेताले लोकान्तरलाई जानकारी दिए ।

केन्द्रमा सत्ता समीकरण फेरबदल भएपछि कांग्रेसको समर्थनमा मुख्यमन्त्री बनेका जम्कट्टेलले पुनः विश्वासको मत लिन लागेका हुन् ।