इलाम–२ मा हुन गइरहेको प्रतिनिधिसभाको उपनिर्वाचनका लागि उम्मेदवार छान्न बसेको नेपाली कांग्रेसको कार्यसम्पादन समिति संसदीय बोर्डको बैठक बिनानिष्कर्ष टुंगिएको छ ।

उम्मेदवारमा सर्वसहमति हुन नसकेपछि मंगलवार सभापति शेरबहादुर देउवाको निवास बूढानीलकण्ठमा बसेको बैठक बुधवार फेरि बस्ने गरी बिनानिष्कर्ष सकिएको हो ।

कांग्रेसले बुधवार दिउँसो २ बजे पुनः संसदीय बोर्ड तथा अपरान्ह ४ बजे कार्यसम्पादन समितिको बैठक राखेको पार्टी केन्द्रीय कार्यालय, सानेपाका मुख्य सचिव कृष्णप्रसाद पौडेलले लोकान्तरलाई जानकारी दिए ।

'इलाम–२ र बझाङ प्रदेशसभा १ मा उम्मेदवार छान्नेलगायत विषयमा बैठक बसेको थियो । मंगलवार नेताहरूले बोल्ने क्रमको पालो नसकिएकाले निष्कर्षमा पुग्न सकिएन । अब बुधवार पुनः बैठक बस्नेछ,’ उनले भने ।

मंगलवारको संसदीय बोर्डको बैठकमा नेताहरूबीच नोकझोक भएको बताइएको छ ।

बैठकमा उम्मेदवार छान्ने विषयमा कुरा नमिलेपछि नोकझोक भएको बैठकनिकट स्रोतले यसअघि लोकान्तरलाई जानकारी दिएको थियो ।

इलाम–२ मा सभापति देउवा पक्षका डम्बरबहादुर खड्का र डा शेखर कोइराला पक्षका भेषराज आचार्य प्रमुख दाबेदार छन् ।

यस्तै कोइराला पक्षकै रमेश लिङ्देनले पनि दाबी गरिरहेका छन् ।  

सभापति देउवाले वैशाख १५ गते हुने उपनिर्वाचनका लागि उम्मेदवार चयनसहित समसामयिक विषयहरूमा छलफल गर्न बैठक बोलाएका हुन् ।

वैशाख १५ गते इलाम–२ मा प्रतिनिधिसभा सदस्य र बझाङ प्रदेशसभा–१ मा प्रदेशसभा सदस्यका लागि निर्वाचन हुँदैछ । इलाम–२ मा भने सत्तारुढ दल नेकपा (एमाले) र राष्ट्रिय स्वतन्त्र पार्टी (रास्वपा)ले आफ्ना उम्मेदवारको टुंगो लगाएर प्रचारमा लागिसकेका छन् । 

एमालेले आफ्ना दिवंगत उपाध्यक्ष सुवास नेम्वाङका छोरा सुहाङलाई उठाएको छ । संविधानसभाका अध्यक्ष नेम्वाङको निधनपछि यो क्षेत्रमा उपनिर्वाचन हुन गइरहेको हो ।

अर्को सत्तारुढ दल नेकपा (माओवादी केन्द्र) र कांग्रेसले भने उम्मेदवारको टुंगो लगाउन सकेका छैनन् ।

बैठकअघि सभापति देउवाले दुवै निर्वाचन क्षेत्रको अवस्थाबारे ग्राउन्ड रिपोर्ट बुझेका छन् ।