गण्डकी प्रदेशका मुख्यमन्त्री सुरेन्द्रराज पाण्डेले राजीनामा दिएका छन् । उनले आज प्रदेश प्रमुख डिल्लीराज भट्टसमक्ष राजीनामा दिएका हुन् ।

फागुन २३ गते माओवादी केन्द्रले पाण्डे सरकारलाई दिएको समर्थन फिर्ता लिएपछि उनी अल्पमतमा परेका थिए ।  

अल्पमतमा परेका पाण्डेले एक महिना भित्र विश्वासको मत लिनुपर्ने संवैधानिक बाध्यता थियो ।

तर पाण्डेले मुख्यमन्त्री पदबाट राजीनामा दिँदै गण्डकीमा नयाँ सरकार गठन गर्न बाटो खुला गरेका छन् ।

पाण्डेको राजीनामासँगै गण्डकीमा नेपालको संविधानको धारा १६८ (२) अनुसार नयाँ सरकार गठनका लागि बाटो खुलेको छ ।

अब प्रदेश प्रमुख भट्टले सोही धाराअनुसार सरकार गठन आह्वान गर्नेछन् ।

संविधानको धारा १६८ (२) उपधारा (१) मा बमोजिम प्रदेश सभामा कुनै पनि दलको स्पष्ट बहुमत नरहेको अवस्थामा प्रदेश सभामा प्रतिनिधित्व गर्ने दुई वा दुई भन्दा बढी दलहरूको समर्थनमा बहुमत प्राप्त गर्न सक्ने प्रदेश सभाको सदस्यलाई प्रदेश प्रमुखले मुख्यमन्त्री नियुक्त गर्ने प्रावधान छ ।