नेपाली कांग्रेसका महामन्त्री विश्वप्रकाश शर्माले सहकारी ठगी सम्बन्धमा लागेको आरोपबारे बहसका लागि उपस्थित हुने गृहमन्त्री रवि लामिछानेलाई स्थान तोकेका छन् ।

रविले कांग्रेसका अर्का महामन्त्री गगन थापालाई लक्षित गर्दै काठमाडौं ४ को कुन ठाउँमा बहस गर्न आउनु पर्ने हो भनेर चुनौती दिएका थिए । 

बुधवार बसेको प्रतिनिधि सभा बैठकको आकस्मिक समयमा विश्वप्रकाश शर्माले सिंहदरबार भित्र गठन हुने संसदीय छानबिन समिति बैठकमा उपस्थित भएर बहस गर्न आग्रह गरेका हुन् ।

‘पुराना दलको कुनै नेताले आरोप लाग्दा यस्तो चुनौती दिएका थिएनन्, उहाँले बहस गर्ने ठाउँ खोज्नु भएको छ । सिंहदरबार भित्र बन्ने संसदीय छानबिन समितिको कार्यालयमा बहस गर्न आउनुस्’, शर्माले भने ।

महामन्त्री शर्माले सहकारी ठगी प्रकरणलाई कांग्रेसले सत्ता बार्गेनिङको विषय बनाएर संसदीय छानबिनका सम्झौता नगर्ने बताए ।

प्रतिनिधि सभाको आगामी बैठकमा संसदीय छानबिनको प्रस्ताव लिएर आउन उनले सरकारलाई अल्टिमेटम दिए ।