नेपाली कांग्रेसका महामन्त्री विश्वप्रकाश शर्माले सहकारी ठगी प्रकरणमा रवि लामिछानेले जीबी राईलाई देखाएर उन्मुक्ति नपाउने बताएका छन् ।

बुधवार प्रतिनिधि सभा बैठकमा सर्वोच्च अदालतले  २०६८ सालमा गरेको एक आदेशको उदाहरण पेश गर्दै शर्माले जीबी राई र रविलाई सोही कानून आकर्षित हुने बताएका हुन् ।

युनिटी नामक नेटवर्किङ व्यवसायको ठगी सम्बन्धमा २०६८ सालमा सुशीला कार्कीले गरेको आदेशमा कम्पनी आफैंमा अमूर्त हुने भएकोले व्यक्तिले बेइमानीको जवाफ दिनुपर्ने फैसला गरेको शर्माले बताए ।

‘युनिटी सम्बन्धमा गरेको फैसलाको नजिर रवि र जीबी सामेल भएको त्यही कानून आकर्षित हुन्छ । गोरखा मिडिया नेटवर्कमा जीबी पछि रवि दोस्रो जिम्मेवारीमा रहँदा ५ वटा शहरका ५० हजार सर्वसाधारणको ८० करोड लगानी भएको छ’, शर्माले भने ।

रास्वपा भित्र काम गर्ने ‘कोर टिम’ रहेछ, ढोकामा बसेर ढाकछोप गर्ने ‘डोर टिम’ रहेको शर्माले टिप्पणी गरे ।

शर्माले सहकारी ठगीमा रहेका जीबी राई गृहमन्त्री लामिछानेको सम्पर्कमा रहेको समेत दाबी गरे । लामिछानेले सहकारी ठगी प्रकरणमा आफ्नो संलग्नता अस्वीकार गर्दै आएका छन् ।

सहकारी ठगीबारे कांग्रेसले उठाएका प्रश्नको जवाफमा रविले बहस गर्न कहाँ आउने हो भनेर सोधेको प्रश्नमा विश्वप्रकाशले स्थान समेत तोकेका छन् ।

‘पुराना दलको कुनै नेताले आरोप लाग्दा यस्तो चुनौती दिएका थिएनन्, उहाँले बहस गर्ने ठाउँ खोज्नु भएको छ । सिंहदरबार भित्र बन्ने संसदीय छानबिन समितिको कार्यालयमा बहस गर्न आउनुस्’, शर्माले भने ।