नेपाली कांग्रेसले दोस्रो दिन बुधवार पनि इलाम र बझाङका लागि उम्मेदवार टुंग्याउन सकेन । सभापति शेरबहादुर देउवाको निवास बूढानीलकण्ठमा बसेको संसदीय बोर्डको बैठकले प्रतिनिधिसभातर्फ इलाम–२ र प्रदेशसभातर्फ बझाङ–१ मा उम्मेदवार टुंग्याउन नसकेको हो । 

‘इलाम र बझाङका लागि सिफारिस भएका नाममा हामीले छलफल गर्यौं । नाममा सहमतिनजिक पनि पुगेका छौं’ कांग्रेस प्रचार विभाग प्रमुख मीन विश्वकर्माले भने, ‘आकांक्षीलाई राखेर सहमति जुटाउन केही समय लाग्ने भयो । बिहीवार बिहान ९ बजे संसदीय बोर्ड र दिउँसो ३ बजे केन्द्रीय कार्यसम्पादन समितिको बैठक बसेर उम्मेदवार टुंग्याउँछौं ।’

सभापति देउवाले इलामका लागि डम्बरबहादुर खड्का र बझाङका लागि अभिषेश सिंहको नाम प्रस्ताव गरेका थिए । 

तर इतर पक्षले इलामका लागि भेषराज आचार्य र बझाङका लागि जगतप्रसाद जोशीको अडान लिएको छ । संस्थापनले इलाम लिए बझाङ इतर पक्षबाट उठाउनुपर्ने अडान उनीहरूको छ ।

सभापति देउवाले प्रस्ताव गरेका खड्का यसअघिको निर्वाचनमा इलाममा ११४ मतले पराजित भएका थिए ।

इलाम–२ मा केशव थापा, रमेश लिङ्देन नगेन्द्र कुमाल, चन्द्रमाया लिम्बू र शान्तिकला तामाङ राईको नाम पनि सिफारिस भएको छ । 

बझाङमा पनि सिंह र जोशीबाहेक सत्यराज भण्डारी, विष्णुकुमार सिंह, नन्दकृष्ण जोशी, अर्जुन स्याडाँ, ध्रुवराज उपाध्याय, लोकेन्द्रबहादुर रोकाया, शान्तिकुमारी बोहरा र नारायण हमालको सिफारिस भएको छ । 

इलाम– २ का लागि नेकपा (एमाले)ले सुहाङ नेम्वाङ र राष्ट्रिय स्वतन्त्र पार्टी (रास्वपा)ले मिलन लिम्बूलाई उम्मेदवार बनाइसकेको छ । नेकपा (माओवादी केन्द्र)ले धीरेन्द्र शर्मालाई उम्मेदवार बनाउने निर्णय गरे पनि पछि एमालेलाई सघाउने निधो गरेको छ ।

यसअघि मंगलवार बसेको संसदीय बोर्डको बैठक पनि बिनानिष्कर्ष टुंगिएको थियो ।