नागरिक उन्मुक्ति पार्टी (नाउपा)की अध्यक्ष रञ्जिता श्रेष्ठले सुदूपश्चिम प्रदेश संसदीय दलका रहेका नेता घनश्याम चौधरीलाई तीन महिनाका लागि निलम्बन गरेकी छिन् ।

पार्टी अध्यक्षलाई पठाएको स्पष्टीकरण चित्तबुझ्दो नभएको भन्दै उनले शुक्रवार घनश्यामलाई तीन महिनाका लागि निलम्बन गरिएको पत्र सभामुख भीमबहादुर भण्डारीलाई पठाएकी छिन् ।

‘पटकपटक बैठक बोलाउँदा नआएको र स्पष्टीकरण पनि चित्तबुझ्दो नभएकाले घनश्याम चौधरीलाई निलम्बन गरिएको हो,’ पत्रमा उल्लेख छ ।

यसअघि केन्द्रीय अध्यक्ष श्रेष्ठले संसदीय दलको नेताको जिम्मेवारीबाट घनश्यामलाई हटाएर कैलाश चौधरीलाई तोकेकी थिइन् । तर, पार्टीको निर्णय लागू हुने नदेखेपछि श्रेष्ठले घनश्यामलाई निलम्बन गरेकी हुन् ।

यसअघि पनि अध्यक्ष श्रेष्ठले समानुपातिक सांसद इन्दिरा गिरीलाई फिर्ता पनि बोलाइसकेकी छिन् ।

शुक्रवार बिहान घनश्यामको अध्यक्षतामा बसेको रेशम पक्षका चारजना सांसदको बैठकले लक्ष्मणकिशोर चौधरी​लाई मुख्यमन्त्रीका रूपमा अघि सार्ने निर्णय गरेको थियो । यसको प्रतिक्रियास्वरुप अध्यक्ष श्रेष्ठले घनश्याम नै गरेकी छिन् ।  

नाउपामा अध्यक्ष श्रेष्ठ र पार्टीका संरक्षकसमेत रहेका उनका पति रेशम चौधरीबीच विवाद छ । यसैको असरस्वरुप घनश्याम निलम्बनमा परेका हुन् । 

घनश्याम नाउपामा रेशम पक्षका हुन् ।