लुम्बिनी प्रदेशका मुख्यमन्त्री जोखबहादुर महराले विश्वासको मत पाएका छन् ।

शुक्रवार बसेको लुम्बिनी प्रदेश सभा बैठकमा मुख्यमन्त्री महराले विश्वासको मत माग्दा उनलाई ४८ प्रदेश सभा सदस्यले पक्षमा मतदान गरेका हुन् ।

२८ जनाले उनको विपक्षमा मतदान गरेका थिए ।

नेकपा माओवादी केन्द्रबाट मुख्यमन्त्री बनेका महरालाई एमालेका २९, माओवादीका १०, नागरिक उन्मुक्ति पार्टी (नाउपा) का ४, जनता समाजवादी पार्टी (जसपा) का ३ र नेकपा एकीकृत समाजवादी र स्वतन्त्रका १/१ गरी ४८ सांसदले विश्वासको मत दिए ।

कांग्रेसले विपक्षमा मतदान गर्दा राप्रपा तटस्थ बस्यो भने लोसपाका सांसद अनुपस्थित रहेका थिए । 

दश राजनीतिक दलको प्रतिनिधित्व रहेको लुम्बिनी प्रदेश सभामा ८७ सदस्य छन् । प्रदेश सभामा बहुमत पुर्‍याउन ४४ प्रदेश सभा सदस्यको समर्थन आवश्यक पर्छ ।

२२ चैतमा विश्वासको मत पाउन अवस्था नभएपछि डिल्ली चौधरी नेतृत्वको सरकार ढलेपछि चैत २३ गते महरा मुख्यमन्त्री नियुक्त भएका थिए ।

सदनमा विश्वासको मत माग्दै प्रदेशको विकासको जग सरकारले यहीँ सरकारले खडा गर्ने बताए ।

केही दिनभित्र मन्त्रिमण्डललाई पूर्णता दिने मुख्यमन्त्री महराले स्पष्ट पारे ।