अमेरिकी राष्ट्रपति जो बाइडेनले आफ्नो देशको सेनाको सहयोगमा इजरायलले इरानको आक्रमणलाई विफल पारेको दाबी गरेका छन् ।

आइतवार बिहान देशको राष्ट्रिय सुरक्षा टोलीका सदस्यहरूसँगको छलफलपछि विज्ञप्ति जारी गर्दै उनले यस्तो बताएका हुन् ।

सो अवसरमा राष्ट्रपति बाइडेनले अमेरिकी सेनाको प्रशंसा गर्दै धन्यवादसमेत दिए ।

'इजरायललाई हाम्रो सेनाले मद्दत गरेका कारण इजरायलले इरानका लगभग सबै ड्रोन र मिसाइल खसाल्न सफल भएको छ,’ उनले भनेका छन् ।

राष्ट्रपति बाइडेनले इरानले गरेको आक्रमणको कडा निन्दासमेत गरेका छन् ।

आक्रमणको खबर पाएलगत्तै अमेरिकी राष्ट्रपति बाइडेनले इजरायली प्रधानमन्त्री बेन्जामिन नेतन्याहूसँग टेलिफोन वार्ता गरेका थिए ।

इरानले शनिवार राति इजरायलका तेल अभिभ र जेरुसेलममा २०० बढी ड्रोन र मिसाइलमार्फत् आक्रमण गरेको छ ।

इरानले इजरायलमा गरेको आक्रमणबाट दक्षिणी क्षेत्रको एक सैन्य शिविरमा सामान्य क्षति भएको इजरेली सेनाले जनाएको छ ।

एम्बुलेन्स सेवाले विस्फोटनका क्रममा खसेको टुक्रा लागेर एक १० वर्षीया बालिका घाइते भएको जनाएको छ ।

धेरैजसो हमलालाई आफ्नो ‘एरो’ हवाई प्रतिरक्षा प्रणाली र उक्त क्षेत्रमा रहेका आफ्ना रणनीतिक साझेदारसँगको साथमा इजरायली भूमि पार गर्नु अगावै निस्तेज पारिएको इजरायल डिफेन्स फोर्स (आईडीएफ)ले जनाएको छ ।

 गत अप्रिल १ मा इजरायलले सिरियाको राजधानी दमास्कसमा रहेको इरानको वाणिज्य दूतावासमा इजरायलले हवाई आक्रमण गरेको थियो । सो आक्रमणबाट सैन्य कमान्डरसहित सात जनाको मृत्यु भएको थियो । सो क्रममा इरानको कुद्स फोर्सका कमान्डर ब्रिगेडियर जनरल मोहम्मद रेजा जाहेदी, डेपुडी ब्रिगेडिएर जनरल मोहम्मद हादी हाजी रहीमीलगायत मारिएका थिए । 

 त्यसको बदलामा इरानले इजरायललाई आक्रमण गर्ने धम्की दिएको थियो । सोहीअनरुप शनिवार राति स्थानीय समयअनुसार १ः४५ बजे इरानले इजरायलमा आक्रमण गरेको हो ।

गत वर्षको अक्टोबर ७ मा हमासले इजरायलमाथि आक्रमण गरेयता मध्यपूर्वमा तनाब छ । गाजामा युद्ध जारी छ । यसमा इरान पनि संग्लग्न भएसँगै यसले झनै उग्ररुप लिने संकेत देखिएको छ ।  

यसैबीच संयुक्त राष्ट्रसंघका महासचिव एन्टिनियो गुटेरेसले इरानले इजरायलमाथि गरेको आक्रमणको आक्रमणको निन्दा गर्दै विश्वले अर्को युद्ध सहन नसक्ने चेतावनी दिएका छन् ।

उनले शनिवार राति वक्तव्य जारी गर्दै दुवै देशलाई शत्रुता अन्त्य गर्न अपिल पनि गरेका छन् ।

‘म विनाशकारी युद्धको खतराबारे चिन्तित छु । म सबै पक्षलाई मध्यपूर्वमा धेरै मोर्चाहरूमा ठूलो सैन्य टकराव निम्त्याउन सक्ने कुनै पनि कार्यबाट बच्न अधिकतम संयम अपनाउन आग्रह गर्दछु,’ उनले भनेका छन्, ‘मैले बारम्बार जोड दिएको छु कि न त मध्यपूर्व न त विश्वले अर्को युद्ध सहन सक्छ ।’

इजरायली सैन्य शिविरमा सामान्य क्षति, एक बालिका घाइते