अख्तियार दुरुपयोग अनुसन्धान आयोगले मुगुको खानेपानी सिँचाई तथा उर्जा विकास कार्यालयका प्रमुख राजीव रिमालसहित ५ जनाविरुद्ध भ्रष्टाचार मुद्दा दायर गरेको छ ।

अख्तियारले रिमालसहित सब-इन्जिनियर नरबहादुर लावड, उपभोक्ता समितिका अध्यक्ष तेजबहादुर शाही, उपाध्यक्ष हिराबहादुर शाही र सचिव तीर्थबहादुर शाहीविरुद्ध आइतवार विशेष अदालत काठमाडौंमा मुद्दा दायर गरेको हो ।

आयोगका प्रवक्ता नरहरि घिमिरेका अनुसार उनीहरूले उपभोक्ता समितिका पदाधिकारीसमेतको मिलेमतोमा आयोजनाको ५ लाख ६१ हजार ४८१ रुपैयाँ भ्रष्टाचार गरेको आरोपमा मुद्दा दायर गरिएको हो ।

आर्थिक वर्ष २०७८/०७९ मा सोरु गाउँपालिकाको वडा नम्बर  ५ मा सिँचाई आयोजनामा निर्माणमा अनियमितता भएको आयोगको दाबी छ ।

कार्यालयका कार्यालय प्रमुख राजीव रिमालले सिँचाई आयोजनाको पाइपलाइनको कार्य १७०० मिटर हुनुपर्नेमा ८१२.५ मिटर मात्र भई ८८७.५ मिटर फिल्डमा कम भएको कामलाई पनि बढी भएको भनेर भुक्तानी गरेको अभियोगपत्रमा उल्लेख छ ।