ओमानमा जारी एसीसी प्रिमियर कप क्रिकेट प्रतियोगिताअन्तर्गत नेपालले आज हङकङसँग खेल्दै छ । दुई देशबीचको खेल नेपाली समयानुसार बिहान पौने १२ बजेबाट शुरू हुनेछ । 

समूह ए मा नेपालले खेलेको अघिल्ला दुवै खेलमा जीत हात पारेको थियो । नेपालले पहिलो खेलमा मलेसियालाई ५ विकेटले पराजित गरेको थियो भने दोस्रो खेलमा कतारमाथि ३२ रनको जीत हात पारेको थियो ।

हङकङले पहिलो खेलमा कतारलाई २६ रनले हराएको थियो भने दोस्रो खेलमा साउदी अरेबियासँग पराजित भएको थियो ।

आज समूह ए मै रहेका मलेसिया र कतार पनि खेल्दैछन् । समूह बी अन्तर्गत ओमान् र यूएई तथा बहराइन र कुवेत खेल्दैछन् । दुवै खेल बेलुका पौने ५ बजे शुरू हुनेछ ।

टी–ट्वेन्टी विश्वकपको तयारीका लागि नियमित अभ्यास गरिरहेको नेपाल एसीसी प्रिमियर कपको सशक्त दाबेदार हो । नेपाल साविक विजेता टोली पनि हो । 

अघिल्लो वर्ष घरेलु मैदानमै भएको एसीसी प्रिमियर कप जितेर पहिलोपटक एसिया कप खेलेको नेपालले भारत र पाकिस्तानजस्ता बलिया टोलीविरुद्ध प्रभावशाली प्रदर्शन गरेको थियो । 

नेपालले वैशाख ५ गते साउदी अरेबियासँग प्रतिस्पर्धा गर्ने छ। 

प्रतियोगितामा सहभागी १० टोलीलाई दुई समूहमा बाँडिएको छ । नेपाल सम्मिलित समूह ‘ए’ मा हङकङ, मलेसिया, कतार र साउदी अरब छन् । 

समूह ‘बी’मा बहराइन, कम्बोडिया, कुवेत, ओमान र यूएई छन् । साउदी अरब र कम्बोडिया च्यालेन्जर्स कपको शीर्ष दुईमा रहँदै प्रिमियर कपका लागि छनोट भएका हुन् ।