कोशी प्रदेश सरकारविरुद्ध नेकपा एमाले र नेकपा माओवादी केन्द्रले प्रदेश सभामा संकल्प प्रस्ताव दर्ता गरेका छन् ।

उनीहरूले सोमवार प्रदेश सभामा दर्ता गराएको संकल्प प्रस्तावमा मुख्यमन्त्री केदार कार्कीले यही वैशाख २५ गतेभित्र विश्वासको मत लिनुपर्ने माग गरिएको छ । विश्वासको नलिए राजीनामा गर्नुपर्ने एमाले-माओवादीको माग छ ।

राजीनामा र विश्वासको मत नलिए मन्त्रिपरिषद्‌का कुनै पनि निर्णय कार्यान्वयन गर्न बाध्य नहुने उनीहरूले दर्ता गरेको संकल्प प्रस्तावमा उल्लेख छ ।

प्रदेशसभा नियमावली २०७४ (पहिलो शंसोधन) समेतको नियम ४७ को उपनियम १ बमोजिमका सर्तका अधीनमा रहेर सोही नियमावलीको नियम ७० को उपनियम १ को खण्ड (ग) बमोजिम संकल्प प्रस्ताव दर्ता गरिएको हो ।

नियमावलीको नियम ७१ बमोजिम संकल्प प्रस्तावको सूचना प्रदेशसभामा दिएको छ ।

प्रस्तावकमा एमालेका प्रमुख सचेतक रेवतीरमण भण्डारी र समर्थकमा निवर्तमान वन वातावरण तथा पर्यटन मन्त्री समेत रहेका माओवादी केन्द्रका सांसद गणेश उप्रेती र एमालेका सांसद किशोरचन्द्र दुलाल प्रस्तावक रहेका छन् ।

यि दुई दलले सरकारलाई दिएको समर्थन र विश्वासको मतसमेत प्रदेशसभाका ५२ जनाले फिर्ता लिइसकेका छन् ।​

उनीहरूले विश्वासको मत तथा राजीनामा नदिएको खण्डमा प्रदेश प्रमुखले बर्खास्त गर्नेसम्मको चेतावनी दिएका छन् ।

वैकल्पिक सरकार बनाउन बाटो खुल्ला नगरे प्रमुख सचिव तथा सचिवहरूले मुख्यमन्त्री र मन्त्रीहरूको निर्णय मान्न बाध्य नहुने पनि उल्लेख गरेका छन् ।

बहुमत सदस्यको विश्वास गुमाइसकेको सरकारका मुख्यमन्त्रीले प्रदेश सभाबाट विश्वासको मत प्राप्त नगरुञ्जेल दीर्घकालिन असर पर्ने प्रकृतिका नीतिगत तथा कार्यक्रम निर्णय एवं गैरबजेटरी शीर्षकमा खर्च गर्ने कार्य नगर्न नगराउन मुख्यमन्त्री, मन्त्रीहरू, प्रमुख सचिव र प्रदेश सरकारका सचिवहरूलाई निर्देशन दिने पनि संकल्प प्रस्तावमा उल्लेख छ ।