बुटवलस्थित सुप्रिम सहकारीको रकम ठगी प्रकरणमा पक्राउ परेका सात जनामध्ये ६ जनालाई रुपन्देही जिल्ला अदालतले धरौटीमा छाड्न आदेश गरेको छ ।

रुपन्देही जिल्ला अदालतका सूचना अधिकारी अनन्त मरासिनीका अनुसार पूर्व उपराष्ट्रपति नन्दबहादुर पुनका छोरा दीपेशसहित ६ जनालाई धरौटीमा छाड्ने आदेश भएको हो ।

रुपन्देही जिल्ला अदालतका न्यायाधीश डा दीपक उप्रेतीको इजलासले सहकारीका अध्यक्षबाहेक ६ जनालाई धरौटीमा छाड्न आदेश दिएको हो ।

सूचना अधिकारी मरासिनीका अनुसार पुनलाई ४ लाख, नवीन अछामीलाई १४ लाख, सहकारीका सचिव दुर्गा चापागाईलाई १८ लाख, दीपक न्यौपानेलाई ४ लाख ४५ हजार, नीता थापा मगरलाई दुई लाख र रोशनी गुरुङलाई २ लाख धरौटीमा छाड्न आदेश गरिएको छ ।

सहकारीको करिब १ अर्ब रुपैयाँ अपचलन भएको बचतकर्ताको उजुरीको आधारमा प्रहरीले अनुसन्धान गर्दा २८ जनालाई प्रतिवादी बनाएको थियो ।

गोर्खा मिडिया नेटवर्कका गितेन्द्र राई (जीबी)सहित बाँकी १९ जना प्रतिवादीको म्याद जारी हुने मरासिनीले बताए ।

राष्ट्रिय स्वतन्त्र पार्टी (रास्वपा)का सभापतिसमेत रहेका रवि लामिछानेले पनि सहकारीको रकम दुरुपयोग गरेको देखिए पनि उनलाई प्रहरीले प्रतिवादी बनाएको थिएन ।

सहकारीका अध्यक्ष ओमप्रकाश गुरुङ भने पुर्पक्षका लागि कारागार चलान भएका छन् ।