भारतमा जारी इंडियन प्रिमियर लिग (आईपीएल) क्रिकेटमा सनराईजर्स हैदराबादले दिल्ली क्यापिटल्समाथि ६७ रनको फराकिलो जीत निकालेको छ ।  

दिल्लीस्थित अरुण जेट्ली रंगशालामा शनिवार टस हारेर पहिला ब्याटिङको निम्तो पाएको हैदराबादले निर्धारित २० ओभरमा ७ विकेट गुमाएर २६६ रनको विशाल योगफल बनायो । यो क्रिकेट इतिहासकै चौथो ठूलो योगफल खडा गरेको थियो । आईपीएल इतिहासमा पहिलो धेरै रन बनाउने टोली पनि हैदराबाद नै बनेको छ । 

यो क्रममा हैदराबादमा ब्याटरहरूले विष्फोटक ब्याटिङ गरेका थिए । हैदराबादका लागि ओपनर द्वय ट्राभिस हेड र अभिषेक शर्माले विष्फोटक शुरूवात गरेका हुन् । 

यसैले हैदराबादले पावर प्लेको ६ ओभरमा नै १२५ रन बनाएको थियो । 

३२ बलको सामना गरेका हेडले  ११ चौका र ६ छक्कासहित सर्वाधिक ८९ रनको पारि खेले । यस्तै १२ बलको सामना गरेका शर्माले २ चौका र ६ छक्का प्रहार गर्दै ४६ रन बनाए । 

यसैगरी शहवाज अहमदले नटआउट ५९ रन, नीतिश रेड्डीले ३७ रनको योगदान गरे ।

दिल्लीका लागि कुलदीप यादवले सर्वाधिक ४ विकेट, मुकेश कुमार र अक्षर पटेलले समान १ विकेट लिएका थिए ।

जवाफी ब्याटिङ गरेको दिल्ली भने १९.१ ओभरमा अलआउट भयो । विशाल रनको लक्ष्य पछ्याएको दिल्लीले १९९ रन मात्र बनायो । 

दिल्लीका लागि जाक फ्रेजर–मक्गर्कले सर्वाधिक अर्धशतकी पारी खेल्दै ६५ रन बनाए ।  

हैदरावादको लागि थांगासु नटराजनले ४ ओभरमा १ मेडनसहित १९ रन खर्चेर सर्वाधिक ४ विकेट लिए । मयंक मार्कण्डे र नितिश रेड्डीले पनि समान २–२ विकेट हात पारे ।

जीतसँगै हैदराबाद ७ खेलमा ५ जीतसहित १० अंक बटुल्दै दोस्रो स्थानमा उक्लिएको छ भने दिल्ली सातौं स्थानमा छ ।

आईपीएलमा आइतवार २ खेल हुँदैछन् । दिउँसो पौने ४ मा कोलकाता नाइट राइडर्स र रोयल च्यालेन्जर्स बेंगलोर तथा बेलुका पौने ८ बजे पञ्जाब किंग्स र गुजरात टाइटन्सबीच प्रतिस्पर्धा हुनेछ ।