प्रमुख प्रतिपक्षी दल नेपाली कांग्रेसका सभापति शेरबहादुर देउवाले फेरि पनि प्रमुख दलबीच निरन्तर सहकार्यको जरुरी रहेको बताएका छन् । 

सत्तारुढ दल नेकपा (एमाले)ले नेपाल कम्युनिस्ट पार्टी स्थापनाको ७५ वर्ष पुगेको अवसर पारेर सोमवार गादावरीमा मनाएको हीरक महोत्सवलाई सम्बोधन गर्दै देउवाले महत्वपूर्ण विषयमा सहकार्य गर्दै आएकोले फेरि पनि सहकार्यको पक्षमा कांग्रेस रहेको बताएका हुन् । 

‘कांग्रेस र एमाले दुवै पार्टी नेपालको राजनीतिक परिवर्तनमा महत्वपूर्ण भूमिका खेल्दै आएका छन् । महत्वपूर्ण एजेन्डामा सहकार्य भएको लामो इतिहास छ । ४६ साल, ६२÷६३ सालको आन्दोलन, संविधान निर्माण र यसको कार्यान्वयन हाम्रो सहमतिको उदाहरण छ,’ उनले भने, ‘कांग्रेसले महत्वपूर्ण विषयमा विद्यमान दलबीच संवाद र सहकार्यको नीति लिएका छौं । हामी यसको निरन्तरताको पक्षमा छौं । फेरि पनि यस्तो सहकर्याको जरुरी छ ।’ 

संविधान कार्यान्वयका लागि पनि मिलेर जानुपर्नेमा पूर्वप्रधानमन्त्रीसमेत रहेका देउवाले जोड दिए ।

संविधानको रक्षा र सुदुढीकरणका लागि प्रमुख दलबीच न्यूनतम सहमति आवश्यक रहेको उनको भनाइ थियो । संसद्लाई राष्ट्रको हितमा काम गर्ने बनाउन पनि मुख्य दल मिल्नुपर्ने उनले बताए ।

देउवाले सँगै रहेका प्रधानमन्त्री पुष्पकमल दाहाल प्रचण्ड, एमाले अध्यक्ष केपी शर्मा ओलीलगायत शीर्ष नेताहरूप्रति लक्षित गर्दै यस्तो बताएका हुन् ।