नेपाली कांग्रेसका सभापति शेरबहादुर देउवाले सहकारी ठगी सम्बन्धमा संसदीय छानबिन समिति गठनको मागमा गम्भीर हुन आग्रह गरेका छन् ।

नेकपा स्थापनाको ७५ औं दिवसको अवसरमा सोमवार नेकपा एमालेले आयोजना गरेको कार्यक्रममा देउवाले प्रतिपक्षी दलले संसद्‌मा उठाएको विषयलाई सकारात्मक रूपमा लिन दलहरूसँग आग्रह गरेका हुन् ।

‘संसद्‌लाई क्रियाशीलतापूर्वक काम गर्न दिइनुपर्छ । संसद्‌मा प्रतिपक्षी दलले उठाएको मुद्दालाई सरकारले सकारात्मकरूपले ग्रहण गर्नुपर्छ’, प्रधानमन्त्री पुष्पकमल दाहाल प्रचण्डसमेत उपस्थित कार्यक्रममा देउवाले  भने, ‘प्रतिपक्षले उठाएको विषयलाई गम्भीरतापूर्वक लिन अनुरोध गर्दछु ।’

पछिल्लो समय संसद्‌मा कांग्रेसले सहकारी ठगीको आरोप लागेका गृहमन्त्री रवि लामिछानेमाथि संसदीय छानबिनको माग गर्दै आइरहेको छ ।

एमालेको कार्यक्रममा गृहमन्त्री लामिछाने पनि सहभागी थिए ।