नेकपा एमालेका अध्यक्ष केपी शर्मा ओलीले सबैलाई साथ लिएर एमालेले अगुवाइ गर्ने बताएका छन् ।

नेकपा एमालेले नेपाल कम्युनिस्ट पार्टी स्थापनाको ७५ वर्ष पुगेको अवसर पारेर मनाएको हीरक महोत्सवलाई सम्बोधन गर्दै ओलीले एमाले एकढिक्का रहेको भन्दै अब पार्टीले सबैको अगुवाइ गर्ने बताएका हुन् । 
‘एमाले आज एक ढिक्का छ । एकताबद्ध रहनेछ । एमालेको आफ्नो काँधमा अभिभारा रहेको छ । एक्लै गर्छौ भनेका छैनौं,’ ओलीले भने, ‘अरुलाई पनि साथ लिएर चलाउँछौं । यसको अगुवाइ एमालेले गर्छ । पदको होइन विचारको अगुवाइ गर्छौ ।’

एमाले वैचारिक रुपमा स्पष्ट भएपछि लोकतान्त्रिक र वाम आन्दोलन सहजै अगाडि बढेको दाबी पनि उनले गरे ।

‘नेपालका सम्पूर्ण कम्युनिस्ट ठान्ने पार्टीलाई बधाई भन्न चाहन्छु । एमालेका तमाम कार्यकर्तालाई बधाई छ । एमाले यस रुपमा वैचारिक स्पष्टताको साथ अगाडि नबढेको भए अन्योलता हट्ने थिएन । लोकतान्त्रिक र वाम आन्दोलन यस रुपमा नरहन सक्थ्यो,’ ओलीले भने, ‘कसैप्रति इंगित गर्ने थलो होइन । सामान्य समीक्षा गरेर आगामी दिनको आफ्नो बाटो , कसरी अगाडि जाने भन्ने समीक्षा गर्ने थलो हो । राजनीतिक, सांगठनिक रुपमा बलियो भएर अगाडि बढ्ने निर्णय गरेका छौं । राष्ट्रियताको पक्षमा के गर्नुपर्छ भन्ने स्पष्ट पारिएको छ । कम्युनिस्ट पार्टी स्थापनाको ७५ वर्ष पुगेकै समयमा यी काम गरेका छौं ।’