लागुऔषध ब्राउन सुगरसहित २० वर्षीय विनोद तामाङ पक्राउ परेका छन् ।​

भारतबाट पैदल आउँदै गर्दा मेचीनगर नगरपालिका वडा नम्बर ६ स्थित मेचीपुलमा जाँचका क्रममा उनलाई पक्राउ गरिएको जिल्ला प्रहरी कार्यालय झापाका सूचना अधिकारी कृष्णकुमार चन्दले जानकारी दिए ।

धादिङ जिल्ला खन्याबास गाउँपालिका–५ बस्ने तामाङको साथबाट ४३.१५ ग्राम ब्राउनसुगर फेला परेको जिल्ला प्रहरी कार्यालय झापाले जनाएको छ ।

सोमवार साँझ मेचीपुलमा लागुऔषध नियन्त्रण ब्यूरो काँकरभिट्टाको प्रहरी टोली र सशस्त्र प्रहरीको संयुक्त टोलीले जाँचका क्रममा उनलाई पक्राउ गरेको हो ।

प्रहरीका अनुसार यस सम्बन्धमा इलाका प्रहरी कार्यालय काँकरभिट्टामा थप अनुसन्धान भइरहेको छ ।