नेपाली कांग्रेसका नेता डा शेखर कोइरालाले संसदीय छानबिन समिति नबनेसम्म सदन चल्न नसक्ने चेतावनी दिएका छन् ।

मंगलवार इलामको चुलाचुलीमा आयोजित चुनावी सभालाई सम्बोधन गर्दै उनले यस्तो बताएका हुन् । 

सुशासन सिकाउने पार्टी र उसको सभापति सहकारी ठगीमा मुछिएको उनले बताए । सुशासन सिकाउने पार्टीको सभापति नै संसदीय छानबिन समिति बनाउन डराएको उनको दाबी थियो ।

चुनावी सभालाई सम्बोधन गर्दै उनले भने, 'रुख चिन्हमा मत हालेर डम्बर खड्कालाई यहाँबाट जिताएर पठाउनुस् इलाम -२ को विकासको जिम्मा म लिन्छु ।'

नेता कोइरालाले नेपाली कांग्रेस नै पहिचानको मुद्दा सबैभन्दा पहिले उठाउने पार्टी भएको बताए । कांग्रेस सधैं पहिचान पहुँच र प्रतिनिधित्वको पक्षमा रहेको भन्दै उनले कांग्रेसबाहेक कसैले पनि पहिचानको मुद्दालाई सम्बोधन गर्छ भन्ने भ्रममा नपर्न आग्रह गरे ।

पहिचान चाहनेहरूले कांग्रेस उमेदवार खड्कालाई मत दिनुपर्ने उनको भनाइ थियो ।