इन्डियन प्रिमियर लिग (आइपीएल) क्रिकेटमा पन्जाब किङ्सले सानदार जीत हात पारेको छ । गएराति सम्पन्न खेलमा जोनी बेयरस्टोले सानदार नटआउट शतक बनाएपछि पन्जाब किङ्सले कोलकाता नाइट राइडर्सलाई ८ विकेटले हराएको हो । 

२६२ रनको विशाल लक्ष्य पन्जाबले ८ बलअघि नै २ विकेट गुमाएरु पूरा गर्‍यो । पन्जाबका लागि बेयरस्टोको शतकसँगै प्रभसिमरन सिंह र शंशाक सिंहले अर्धशक बनाए । 

४८ बलमा बेयरस्टोले ९ छक्का र ८ चौको मद्दतमा नटआउट १०८ रन बनाए । त्यस्तै २८ बलमा शंशाकले नटआउट ६८ रन जोडे ।

प्रभसिमरनले २० बलमा ५४ रन बनाए । कोलकाताका लागि सुनिल नारिनले १ विकेट लिएका थिए ।

त्यसअघि टस हारेर ब्याटिङका लागि आमन्त्रण गरिएको कोलकाताले निर्धारित २० ओभरमा ६ विकेटमा २६१ रन बनाएको थियो ।

९ खेलपछि पन्जाबको ६ अंक पुगेको छ । पन्जाब आठौं स्थानमा छ । १० अंकसहित कोलकाता दोस्रो स्थानमा छ । शीर्षस्थानको राजस्थान रोयल्सको १४ अंक छ ।