निर्वाचन आयोगका प्रमुख आयुक्त दिनेश थपलियाले इलाम-२ का राष्ट्रिय स्वतन्त्र पार्टी (रास्वपा)का उम्मेदवार मिलन लिम्बूलाई कारबाही गर्न निर्देशन दिएका छन् । 

लिम्बूले मतदानका क्रममा आफ्नो पार्टीको चुनाव चिह्न घण्टीको ब्याच कोटमा लगाएका थिए । उक्त तस्वीर सामाजिक सञ्जालमा आफैंले पोस्टसमेत गरेका थिए । 

प्रमुख आयुक्त थपलियाले उक्त कार्य निर्वाचन आचारसंहिताअनुसार नभएको भन्दै कारवाही गर्न जिल्ला निर्वाचन अनुगमन समितिलाई निर्देशन दिएको बताए । 

'इलाम-२ मा रास्वपाका उम्मेदवार मिलन लिम्बुबाट आचारसंहिता उल्लंघन भएको देखियो, स्पष्टीकरण सोध्छौं,' उनले भने, 'चित्तबुझ्दो जवाफ नआए कारबाही गर्छौं ।'

उनले अनुगमन समितिलाई निर्वाचन आचारसंहिता उल्लङ्घन गरेको आरोपमा कारवाही प्रक्रिया अघि बढाउन निर्देशनसमेत दिएको बताए । 

'रास्वपाका उम्मेदवारले आफ्नो पार्टीको चुनाव चिह्नको घण्टीसहित गएर मतदान गरेको जानकारी हुन आएको छ,' उनले भने, 'तदनुसारकै प्रक्रिया अघि बढाउन र अन्य कानूनी व्यवस्थासहित थप आदेश दिनु नपर्ने गरी कारवाही गर्न हामीले निर्देशन दिएका छौं ।'