इन्डियन प्रिमियर लिग (आईपीएल) क्रिकेटमा कोलकत्ता नाइट राइडर्सले मुम्बई इंडियनलाई हराएको छ । १२ वर्षपछि मुम्बईकै घरेलु मैदानमा कोलकत्ताले २४ रनको जीत दर्ता गरेको हो । कोलकाताले मुम्बईलाई १२ वर्षपछि वानखेडे मैदानमा हराएको हो । यस मैदानमा मुम्बईविरुद्ध नाइट राइडर्सको अन्तिम जित सन् २०१२ मा भएको थियो।

कोलकत्ताले दिएको १७० रनको लक्ष्य पछ्याएको मुम्बई १८.५ ओभरमा १४५ रनमै आल आउट भयो । मुम्बईका सूर्यकुमार यादवले ३५ बलमा ५६ रन बनाए । यस्तै टिम डेभिडले २० बलमा २४ रन जोडे । अन्य ब्याटरले भने उल्लेख्य रन बनाउन सकेनन् । 

कोलकत्ताका लागि मिचेल स्टार्क एक्लैले ४ विकेट लिए । यस्तै वरुण चक्रवर्ती, सुनिल नरिन र आन्द्रे रसेलले समान २-२ विकेट लिए ।

त्यसअघि टस हारेर ब्याटिङ गरेको कोलकत्ता १९.५ ओभरमा अलआउट हुँदै १६९ बनाएको थियो । कोलकत्ता भेन्कटेश ऐयरले ५२ बलमा सर्वाधिक ७० रन बनाए । मनिष पाण्डेले ३१ बलमा ४१ रन जोडे । 

मुम्बईका नुवान थुसरा र जस्पृत बुम्राहले समान ३-३ विकेट लिए भने हार्दिक पन्ड्याले २ तथा पियुस चावलाले १ विकेट लिए ।

जितसँगै कोलकत्ता १० खेलमा १४ अंकसहित तालिकाको दोस्रो स्थानमा उक्लिएको छ । मुम्बई भने ११ खेलमा ६ अंकसहित नवौं छ । पाँच पटकको च्याम्पियन मुम्बई आईपीएल–२०२४ को प्लेअफको दौडबाट लगभग बाहिरिएको छ ।