उपप्रधान तथा स्वास्थ्यमन्त्री उपेन्द्र यादव नेतृत्वको जनता समाजवादी पार्टी (जसपा) विभाजनको मुखमा पुगेको छ ।

जसपाका ७ सांसदले दल विभाजनका लागि निवेदन दिने तयारी गरेका हुन् । त्यसका लागि सकेसम्म आजै निर्वाचन आयोगमा निवेदन दिने तयारी छ ।

विश्वस्त स्रोतका अनुसार सांसदहरू अशोक राई, प्रदीप यादव, वीरेन्द्र महतो, नवलकिशोर साह सुडी, सुशीला श्रेष्ठ, हसिना खानुत, रञ्जु ठाकुर लगायत विद्रोहको तयारीमा छन् ।

जसपा अध्यक्ष यादव अहिले अमेरिकामा छन् । संघमा सत्ता साझेदार जसपाका १२ सांसद छन् । त्यसमध्ये ७ सांसदले दल विभाजन गर्न लागेका हुन् ।

राजनीतिक दलसम्बन्धी ऐनमा केन्द्रीय समिति र संसदीय दलमा ४० प्रतिशत पुर्‍याएर दल विभाजन गर्न सकिने व्यवस्था छ ।