नेकपा एमालेका उपाध्यक्ष विष्णु पौडेलले अर्थतन्त्रमा अहिले देखिएको निराशा चिर्न 'बिग पुस' आवश्यक रहेको बताएका छन् । 

आठौँ वार्षिकोत्सवका अवसरमा लोकान्तरले आयोजना गरेको आर्थिक बहसका क्रममा उनले निजी क्षेत्रलाई विश्वासमा लिएर अर्थतन्त्रमा बिग पुस गर्नुपर्ने जरुरी रहेको बताएका हुन् । 

पूर्वअर्थमन्त्रीसमेत रहेका उपाध्यक्ष पौडेलले अहिलेको अर्थतन्त्र समस्याको शुरूको कुरा भनेको राजनीतिक स्थायित्व नहुनु रहेको बताए । 

'समीकरण बन्दा र भत्काउँदा देश कता जान्छ भन्ने सोच्नुपर्छ । खासगरी यो हंग पार्लियामेन्टमा संयुक्त सरकार बाध्यकारी हो । तर देशलाई स्थिरता दिन सक्ने सरकार बन्नुपर्छ र अहिलेको सरकार त्यस्तै बनेको छ,' उनले भने । 

तर यो गठबन्धनलाई भत्काउन कोशिश भइरहेको उनले दाबी गरे । 

'अर्थतन्त्रका समस्यालाई सार्थक समाधान गर्नुपर्छ भन्नेमा पनि हामी लागिरहेका छौं । अहिलेको निराशाको मुख्य कारण राजनीति हो,' पौडेलले भने ।