रुपन्देहीमा कार दुर्घटना, ३ जनाको मृत्यु

रुपन्देहीमा बुधबार राति भएको कार दुर्घटनामा ३ जनाको मृत्यु भएको छ । घुमघामपछि पाल्पाको नुवाकोटबाट बुटवलतर्फ आउँदै गरेको कार दुर्घटनामा परी ३ जनाको मृत्यु भएको प्रहरीले जनाएको छ । 

लु २ च ८५३१ नम्बरको कार बुटवल–१३ स्थित बंदेलपोखरीमाथिको सडकबाट करिब सय मिटर तल खसेको इलाका प्रहरी कार्यालय बुटवलले जनाएको छ । 

मृत्यु हुनेमा कार चालक ५६ वर्षीय रामप्रसाद शर्मा, तिलोत्तमा–३ की ५७ वर्षीया आशा श्रेष्ठ र सोही ठाउँकी ५० वर्षीया भगवती श्रेष्ठ रहेका छन् ।

उनीहरुको लुम्बिनी प्रादेशिक अस्पतालमा उपचारका क्रममा मृत्यु भएको प्रहरीले जनाएको छ ।  दुर्घटनामा थप २ जना घाइते भएका छन् भने उनीहरुको पनि लुम्बिनी प्रादेशिक अस्पतालमा उपचार भइरहेको छ ।