०५ साउन २०८३, मंगलबार
काठमाडौंको प्राचीन सहरी बस्ती असनको मौलिकता फिर्ता गराउन हरेक शनिवार विशेष कार्यक्रम सञ्चालन गरिने भएको छ । काठमाडौं महानगरपालिकाको वडा नं. २७ कार्यालयको नेतृत्व, अन्नपूर्ण आरसीटी क्लबसहित स्थानीय क्लब, टोल सुधार समिति, गुठियार, सरोकारवाला र साझेदारहरुको सहभागिता तथा स्थानीय अपनत्वमा कार्यक्रम शुरू हुने भएको हो ।
महानगरका प्रवक्ता नविन मानन्धरका अनुसार कार्यक्रम कःमिलाछी (कमलाक्षी) चोकदेखि असनसम्म, भोटाहिटी चोकदेखि असनसम्म र महाबौद्धबाट असनसम्मको क्षेत्रमा सञ्चालन हुनेछ । हरेक शनिवार सञ्चालन हुने यो कार्यक्रम अवधिमा सवारी साधन प्रवेश निषेध गरिनेछ ।
यसरी गरिने कामले काठमाडौंको सांस्कृतिक पहिचान, सहरभित्रका परम्परागत जीवनशैली, जात्रा पर्व, संस्कार संस्कृति पुस्तान्तरण हुँदै जाने महानगरको विश्वास छ । असनमा शनिबारबाट निःशुल्क वाटर एटिएम मेसिन सञ्चालन हुने छ।
