स्थानीयको अवरोधका कारण शनिबार राति रोकिएको सुकुमवासी बस्तीको टहरा हटाउने कामलाई आज (आइतबार) निरन्तरता दिइने भएको छ । कोटेश्वर जडिबुटी क्षेत्रको मनोहरा क्षेत्रमा टहरा हटाउन काठमाडौंको नगर प्रहरी र ठूलो संख्यामा नेपाल प्रहरी परिचालन गरिएको छ ।

शनिबार थापापली र तीनकुने शान्तिनगर क्षेत्रका सुकुमवासी बस्तीका घर–टहरा भत्काइएको थियो । थापाथली र शान्तिनगर क्षेत्रमा सामान्य विरोध भए पनि जडिबुटी क्षेत्रमा अवरोध भएको थियो ।

ढुंगामुढा र सिसाका बोत्तल प्रहार भएपछि शनिबार रोकिएको टहरा हटाउने कामलाई आइतबार निरन्तरता दिन लागिएको काठमाडौं महानगरका नगर प्रहरी प्रमुख विष्णुप्रसाद जोशीले जानकारी दिए ।

सरकारले काठमाडौंको नदी किनाराका सार्वजनिक स्थल खाली गर्न भन्दै सुकुमवासी बस्ती हटाउने निर्णय लिएको थियो । विस्थापित वास्तविक सुकुम्बासीलाई अन्यत्र बसोवासको व्यवस्था गर्ने प्रधानमन्त्री बालेन शाहले आश्वासन दिएका छन् ।