०५ साउन २०८३, मंगलबार
नेपाल ब्याडमिन्टन संघद्वारा काठमाडौंमा आयोजित ४२औँ राष्ट्रिय ब्याडमिन्टन प्रतियोगिताको महिला एकलतर्फको उपाधि त्रिभुवन आर्मी क्लबकी रसिला महर्जनले जितेकी छन् ।
त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा शनिबार खेलिएको फाइनल खेलमा रसिलाले कोशी प्रदेशकी नङ्सलदेवी तामाङलाई हराउँदै उपाधि चुमेकी हुन् ।
रसिलाले नङ्सललाई २१–१८ र २१–१८ को सोझो सेटमा पराजित गरेकी हुन् । उक्त स्पर्धामा आर्मी क्लबकी अमिता गिरी र आर्मी क्लबकै रिहाना शेरचन संयुक्त रूपमा तेस्रो भए ।
प्रतियोगितामा सात प्रदेश र तीन विभागीय टोलीका एक सय १५ खेलाडीले विभिन्न पाँच स्पर्धामा प्रतिस्पर्धा गरेका थिए ।
यसैगरी, महिला डबल्सतर्फको उपाधि आर्मी क्लबका अमिता गिरी र रसिला महर्जनको जोडीले जित्यो ।
उक्त जोडीले फाइनलमा कोशी प्रदेशकी रोजी राई र निसम सुब्बाको जोडीलाई २१–१७ र २१–१७ को सोझो सेटमा हरायो ।
उक्त स्पर्धामा कोशी प्रदेशकी नङ्सल तामाङ र भावनादेवी किदम तथा नेपाल पुलिस क्लबका सीता राई र सुष्मा श्रेष्ठको जोडी संयुक्त रूपमा तेस्रो भयो ।
