०६ साउन २०८३, बुधबार
नेकपा एमालेले पूर्व राष्ट्रपति विद्यादेवी भण्डारीको पुरानै पार्टी सदस्यता कायम गरेर नवीकरण गर्ने भएको छ ।
आइतबार सम्पन्न सचिवालय बैठकपछि सचिव महेश बस्नेतले २०३४ सालदेखिको भण्डारीको पार्टी सदस्यता र वरिष्ठतालाई यथावत् कायम गर्दै नवीकरण गर्ने सर्वसम्मतले निर्णय गरेको जानकारी दिए ।
भण्डारीले ८ वर्ष राष्ट्रपतिको रूपमा देशको सर्वोच्च पद सम्हाल्दा संवैधानिक बाध्यताका कारण पार्टी सदस्यता त्यागेकी थिइन् । बैठकले उक्त ८ वर्षको अवधिलाई पार्टीमा सक्रिय नरहेको अवधिको रूपमा स्वीकार गर्दै उनको पुरानो सदस्यतालाई पुनः कायम गरेको बस्नेतको भनाइ थियो ।
'विगतमा पार्टीले गरेको निर्णय र उहाँले राष्ट्रपतिको रूपमा बिताउनुभएको ८ वर्षको समयलाई ध्यानमा राख्दै २०३४ सालदेखिको उहाँको पार्टी सदस्यता र वरिष्ठतालाई यथावत् कायम गर्ने निर्णय सर्वसम्मतले भएको छ,' सचिव बस्नेतले भने ।
यो निर्णयसँगै पूर्व राष्ट्रपति भण्डारीलाई पुनः एमालेको सक्रिय राजनीतिमा फर्कने र पार्टीको माथिल्लो तहमा जिम्मेवारी लिने वैधानिक बाटो खुलेको छ ।
उपमहासचिव लेखराज भट्टले पनि पार्टीको यो निर्णयले अनुभवी नेताहरूलाई सम्मान र स्थान दिने पार्टीको नीतिलाई स्पष्ट पारेको बताए ।
