इरानका विभिन्न सैन्य ठेगानाहरूमाथि अमेरिकाले पुनः नयाँ चरणको हवाई आक्रमण गरेपछि बिहीबार अन्तर्राष्ट्रिय बजारमा कच्चा तेलको मूल्य झन्डै ३ प्रतिशतले बढेको छ । ताजा सैन्य तनाबले पश्चिम एसिया (मध्यपूर्व) मा लामो समयसम्म द्वन्द्व तन्किने र विश्वव्यापी ऊर्जा आपूर्ति प्रणालीमा गम्भीर अवरोध आउने त्रास लगानीकर्ता तथा व्यापारीहरूमाझ बढाएको छ ।

भौगोलिक-राजनीतिक जोखिम बढेसँगै बजारमा जुलाई डेलिभरीका लागि अमेरिकी वेस्ट टेक्सास इन्टरमिडिएट क्रुड फ्युचर्सको मूल्य प्रतिब्यारेल ९२.७ डलर आसपास पुगेको छ भने ब्रेन्ट क्रुड फ्युचर्सको मूल्य बढेर प्रतिब्यारेल ९५.४ डलर आसपास कायम भएको अन्तर्राष्ट्रिय सञ्चार माध्यमहरूले जनाएका छन् । 

राष्ट्रपति डोनाल्ड ट्रम्पको निर्देशनमा अमेरिकी सेनाले इरानभित्रका बहुपक्षीय लक्ष्यहरूमाथि अतिरिक्त आत्मरक्षाका लागि हमलाहरू शुरू गरेको पुष्टि गरेको छ । अमेरिकाले यसलाई इरानको निरन्तर आक्रामकताको जवाफ भनेको छ । अर्कोतर्फ, इरानी सरकारी सञ्चारमाध्यमहरूले हर्मोज जलमार्ग नजिक सञ्चालित अमेरिका सम्बद्ध सैन्य अखडा र जहाजहरूमाथि मिसाइल तथा ड्रोन आक्रमण गरिएको दाबी गरेका छन् ।

यस सैन्य टकरावले विश्वकै सबैभन्दा महत्त्वपूर्ण तेल पारवहन मार्ग मानिने हर्मोजतर्फ पुनः विश्वको ध्यान खिचेको छ । पछिल्लो अमेरिकी हमलापछि इरानले सो रणनीतिक जलमार्ग पूर्ण रूपमा बन्द गरिएको घोषणा गर्दै त्यहाँबाट आवतजावत गर्न खोज्ने जहाजहरूले सैन्य कारबाहीको सामना गर्नुपर्ने चेतावनी दिएको छ । सामान्य अवस्थामा विश्वको कुल तेल र ग्यास आपूर्तिको झन्डै पाँचौँ हिस्सा (२० प्रतिशत) यही साँघुरो जलमार्ग हुँदै ओसारपसार हुने भएकाले यो बन्द हुँदा ऊर्जा बजारमा ठुलो हलचल मच्चिएको हो ।