०७ साउन २०८३, बिहीबार
सन् २०२६ को फिफा विश्वकपको समूह ‘आई’अन्तर्गत मंगलबार बिहान खेलिने खेलमा विश्व फुटबलको महाशक्ति फ्रान्स र एसियाली टोली इराक आमने–सामने हुँदैछन् ।
इराक र फ्रान्सबीचको खेल अमेरिकाको बोस्टनस्थित रंगशालामा नेपाली समयअनुसार, बिहान ०२:४५ बजे शुरू हुनेछ ।
यो खेल फ्रान्सका लागि नकआउट चरणको यात्रा सुनिश्चित गर्ने गतिलो अवसर हो भने इराकका लागि प्रतियोगितामा कायमै रहने कठिन चुनौती ।
गत संस्करणको उपविजेता फ्रान्सले आफ्नो पहिलो खेलमा सेनेगलविरुद्ध ३–१ गोलको शानदार जित निकालेको थियो ।
त्यो खेलको पहिलो हाफमा केही सुस्त देखिएको फ्रान्सेली टोली दोस्रो हाफमा पूर्ण रूपमा लयमा फर्किएको थियो ।
खासगरी टोलीका स्टार स्ट्राइकर किलियन एम्बाप्पेको दुई गोलले टोलीलाई जित दिलाउन महत्त्वपूर्ण भूमिका निर्वाह गरेको थियो ।
अर्को एक गोल ब्राड्ली बार्कोलाले गरेका थिए । एम्बाप्पेले हालसम्म विश्वकपमा १४ गोल गरिसकेका छन् । उनी विश्वकपमा सर्वाधिक गोल गर्ने खेलाडीभन्दा केवल दुई गोलले पछि छन् ।
टोलीका मुख्य प्रशिक्षक डिडियर डेसच्याम्पस इराकविरुद्धको खेलमा टोलीमा केही रणनीतिक परिवर्तन गर्ने तयारीमा छन् ।
रिपोर्टहरूका अनुसार, सेनेगलविरुद्ध बेन्चबाट आएर गोल गरेका ब्राडली बार्कोलालाई शुरूआती–११ मै मौका दिइने सम्भावना छ ।
यसैगरी, डिफेन्समा लुकास डिग्ने र मिडफिल्डमा मानु कोनेसँगै एड्रिएन राबिओटलाई जिम्मेवारी दिने बलियो सम्भावना छ ।
अर्कोतिर, सन् १९८६ पछि पहिलोपटक विश्वकपमा छनोट भएको इराकका लागि यो संस्करण निकै कठिन सावित भइरहेको छ ।
पहिलो खेलमै नर्वेसँग १–४ गोलको ठूलो अन्तरले पराजित भएको इराकले समूहकै अर्को बलियो टोली फ्रान्सको सामना गर्दा थप दबाब झेल्नु पर्नेछ ।
त्यसैले यो खेल इराकका लागि आफ्नो अस्तित्व जोगाउने गतिलो अवसर हो । इराकका प्रशिक्षक ग्राहम आर्नोल्डका लागि पनि यो खेल निकै चुनौतीपूर्ण छ ।
तथ्यांक विश्लेषक ‘ओप्टा’को सुपर कम्प्युटरले फ्रान्सको जित्ने सम्भावना ८८.५ प्रतिशत देखाएको छ, जबकि इराकको जितको सम्भावना केवल तीन प्रतिशत छ ।
चोटका कारण नर्वेविरुद्ध मैदान बाहिरिएका फरवार्ड अली जासिम फ्रान्सविरुद्धको खेलका लागि मैदानमा उपलब्ध रहने अनुमान गरिएको छ ।
यसैगरी, टोलीका कप्तानसमेत रहेका गोलरक्षकमा जलाल हसनको स्थानमा अहमद बासिलले मौका पाउने सम्भावना पनि उत्तिकै छ ।
अहिले समूह ‘आई’मा रहेका चारवटै टोलीले एक–एक खेलमात्र खेलेका छन् । तालिकामा नर्वे तीन अंकसहित शीर्ष स्थानमा छ ।
समान तीन अंक बटुलेको फ्रान्स गोलअन्तरका आधारमा दोस्रो स्थानमा आसिन छ । आफ्नो पहिलो खेलमै पराजित भएका सेनेगल र इराक अंकविहीन छन् ।
हरेक समूहबाट शीर्ष दुई टोली र तेस्रो स्थानमा रहने उत्कृष्ट आठ टोली प्रतियोगिताको अन्तिम–३२ मा प्रवेश गर्ने प्रावधान छ ।
समूह ‘आई’को अर्को खेल पनि मंगलबार बिहान नर्वे र सेनेगलबीच खेलिने छ । यो खेल बिहान ०५:४५ बजे अमरिकाको न्यू योर्कस्थित मेटलाइफ स्टेडियममा शुरू हुनेछ ।
