०९ साउन २०८३, शनिबार
विश्व फुटबलका महान् खेलाडी क्रिस्टियानो रोनाल्डोको विश्वकप उपाधि जित्ने सपना लगभग सधैँका लागि अधुरै रहन पुगेको छ । अमेरिकाको टेक्सासमा गएराति सम्पन्न विश्वकप २०२६ को रोमाञ्चक 'राउन्ड अफ १६' को खेलमा छिमेकी प्रतिद्वन्द्वी स्पेनसँग पोर्चुगल १-० ले पराजित भएसँगै ४१ वर्षीय सुपरस्टार रोनाल्डोको विश्वकप यात्रा आँसु र निराशाबीच समाप्त भएको हो ।
खेलको इन्जुरी समयमा स्पेनका मिकेल मेरिनोले निर्णायक गोल गर्दै पोर्चुगललाई घर फर्काए । खेल सकिएपछि मैदानबाट बाहिरिने क्रममा रोनाल्डो निकै भावुक देखिएका थिए । आफ्नो छैटौँ तथा अन्तिम विश्वकप खेलिरहेका उनले समर्थकहरूतर्फ हात हल्लाउँदै मैदान छाडेका थिए ।
खेलपछि मिडियासँग कुरा गर्दै रोनाल्डो भने शान्त र दृढ सुनिए । उनले भने, 'यसरी प्रतियोगिताबाट बाहिरिनु पर्दा दुःख लाग्नु स्वाभाविक हो । तर मैले आफ्नो तर्फबाट सबैथोक दिएँ, आफ्नो उत्कृष्ट प्रदर्शन गरेँ । म सफा विवेकका साथ मैदानबाट बिदा हुँदैछु । यही फुटबल हो, यही जीवन हो । कहिले जितिन्छ, कहिले हारिन्छ ।'
अन्तर्राष्ट्रिय फुटबलमा सर्वाधिक १४६ गोलको कीर्तिमान बनाएका रोनाल्डोले यो आफ्नो अन्तिम विश्वकप भएको पुनः पुष्टि गरे । यद्यपि, पोर्चुगलको राष्ट्रिय टोलीबाट अगाडिको यात्रा के हुने भन्नेबारे उनले हतारमा कुनै निर्णय नलिने र सोच्ने बताए।
पोर्चुगल विश्वकपबाट बाहिरिएसँगै टोलीका मुख्य प्रशिक्षक रोबर्टो मार्टिनेजले आफ्नो पदबाट राजीनामा दिएका छन्। उनले पोर्चुगललाई विश्वकप जिताउने सम्झौता पूरा हुन नसकेकाले पदमा रहिरहनुको औचित्य नभएको बताए । मार्टिनेजले रोनाल्डोलाई फुटबलको 'आइकन' भन्दै उनको बचाउ गरे ।
पराजयसँगै फुटबल जगत्मा लामो समयदेखि चल्दै आएको क्रिस्टियानो रोनाल्डो कि लियोनेल मेसी श्रेष्ठ? भन्ने बहसले नयाँ मोड लिएको छ। मेसीले सन् २०२२ मा नै अर्जेन्टिनालाई विश्वकप जिताइसकेका छन् भने जारी विश्वकपमा पनि उनी ७ गोलसहित उच्च फर्ममा छन् । अर्कोतर्फ रोनाल्डोले आफ्नो खेल जीवनमा विश्वकपको ट्रफी छुन पाएनन् । विश्वकपको इतिहासमा मेसीको नाममा २० गोल भइसकेको छ भने रोनाल्डो ११ गोलमा रोकिनु परेको छ ।
रोनाल्डोको विश्वकप यात्रा समाप्त भए पनि उनले फुटबल इतिहासमा छोडेको पदचाप र कीर्तिमानहरूलाई विश्वले सधैँ सम्मान गरिरहनेछ।
युरोपेली फुटबलका दुई महारथीबीचको रोमाञ्चक भिडन्तमा पोर्चुगललाई स्तब्ध पार्दै स्पेन भने क्वाटरफाइनलमा प्रवेश गरेको छ । खेलभरि नै दुवै टोलीले आक्रामक खेल पस्किए पनि निर्धारित ९० मिनेटको समयसम्म कुनै गोल हुन सकेको थिएन। तर, खेलको निर्णय इन्जुरी समयमा हुन पुग्यो । स्पेनका मिकेल मेरिनोले खेलको अन्तिम क्षणमा उत्कृष्ट गोल गर्दै आफ्नो टोलीलाई क्वाटरफाइनलको टिकट दिलाए भने पोर्चुगललाई प्रतियोगिताबाट बाहिर पठाए ।
खेलको सुरुवाती चरणदेखि नै स्पेनले बलमाथि नियन्त्रण जमाउने प्रयास गरेको थियो भने पोर्चुगलले काउन्टर अट्याकमा जोड दिएको थियो । पोर्चुगलका कप्तान क्रिस्टियानो रोनाल्डोले पहिलो हाफमा प्रहार गरेको एउटा कडा बललाई स्पेनका गोलकिपर उनाई सिमोनले हावामै उफ्रिएर उत्कृष्ट बचाउ गरेका थिए । रोनाल्डो र जोआओ फेलिक्सका थुप्रै प्रहारहरूलाई विफल पार्दै सिमोन स्पेनका लागि मैदानमा बलियो पर्खाल बनेर उभिए ।
पोर्चुगलको बलियो रक्षापङ्क्तिलाई तोड्न सङ्घर्ष गरिरहेको स्पेनलाई खेलको अन्तिम मिनेटमा मिकेल मेरिनोले राहत दिलाए । उनको सोही गोल नै स्पेनलाई क्वाटरफाइनल पुर्याउन पर्याप्त बन्यो । जितसँगै स्पेनले उपाधि दाबेदारको रूपमा आफ्नो बलियो उपस्थिति प्रमाणित गरेको छ ।
