१० साउन २०८३, आइतबार
सन् २०२६ को पुरुष फुटबल विश्वकपको समापनसँगै विश्व फुटबलका कयौँ दिग्गज खेलाडीहरूले अन्तर्राष्ट्रिय फुटबलबाट संन्यासको घोषणा गरेका छन् । प्रतियोगिता सकिएलगत्तै जर्मनीलाई सन् २०१४ मा विश्व विजेता बनाउन महत्त्वपूर्ण भूमिका खेलेका गोलकिपर मानुएल नोयरदेखि ब्राजिलियन स्टार नेयमारसहित ११ जना चर्चित खेलाडीहरूले देशका लागि आफ्नो यात्रा समाप्त भएको बताएका हुन् ।
जर्मनीका ४० वर्षीय भेट्रान गोलकिपर मानुएल नोयरले पराग्वेसँगको पेनाल्टी सुटआउटमा पराजित भएसँगै अन्तर्राष्ट्रिय करियर टुङ्ग्याएका हुन् । युरो २०२४ पछि सन्यास लिएर पुनः टोलीमा फर्किएका नोयरले आफ्नो २३औँ तथा अन्तिम विश्वकप खेलपछि बोल्दै सो निर्णयप्रति कुनै पछुतो नरहेको स्पष्ट पारे । यद्यपि, पूर्वजर्मन डिफेन्डर रोबर्ट हुथले नोयरलाई ढिला गरी टोलीमा फर्काउने निर्णयले टोलीको सन्तुलन बिगारेको भन्दै आलोचना गरेका छन् ।
यसैगरी, ब्राजिलका ३४ वर्षीय स्टार खेलाडी नेयमारले पनि नर्वेविरुद्धको पराजयसँगै अन्तर्राष्ट्रिय फुटबलबाट सन्यास लिएका छन् । सन् २०१४ को विश्वकपमा दुई गोल गर्दै विश्वकप यात्रा शुरू गरेका उनले चोटका कारण यस विश्वकपमा मात्र ५५ मिनेट खेलेका थिए । उनले सन् २०१० मा अमेरिकी भूमि (मेटलाइफ स्टेडियम) बाटै डेब्यु गरेको र सोही स्थानमै अन्तिम म्याच खेलेर यात्रा टुङ्ग्याउन पाएकोमा खुसी व्यक्त गरे । उनको सन्यासलाई लिएर पूर्व स्वीडिस स्टार ज्लातान इब्राहिमोभिचले ब्राजिलियन फुटबलका लागि यो दुःखद क्षण भएको प्रतिक्रिया दिएका छन् ।
त्यस्तै, अल्जेरियाका ३५ वर्षीय कप्तान तथा प्रिमियर लिग र च्याम्पियन्स लिग विजेता स्टार रियाद माहरेजले स्वीट्जरल्यान्डसँग अन्तिम ३२ को खेलमा पराजित भएपछि सन्यासको घोषणा गरे । सन् २०१४ पछि १२ वर्षको प्रतीक्षापछि विश्वकप खेलेका उनले अस्ट्रियाविरुद्ध दुई गोल गरेका थिए । माहरेजले देशको प्रतिनिधित्व गर्नु आफ्नो जीवनको सबैभन्दा ठुलो गर्वको विषय भएको बताएका छन् ।
सन् २०२२ मा अर्जेन्टिनालाई विश्वकप जिताउन महत्त्वपूर्ण भूमिका खेलेका ३८ वर्षीय डिफेन्डर निकोलस ओटामेन्डीले पनि यस विश्वकपपछि अन्तर्राष्ट्रिय फुटबलबाट बिदा लिएका छन् । उनले गत मार्चमै आफ्नो अन्तिम विश्वकप हुने घोषणा गरिसकेका थिए । उनको सम्मानमा लियोनेल मेसीले घरेलु मैदान ला बोम्बोनेरामा भएको म्याचमा उनलाई पेनाल्टी प्रहार गर्न दिएका थिए ।
इक्वेडरका ३६ वर्षीय फरवार्ड इनर भ्यालेन्सियाले मेक्सिकोसँगको पराजयपछि टनेलमा पत्रकारहरूसँग बोल्दै आफ्नो अन्तिम म्याच खेलिसकेको घोषणा गरे । विश्वकपमा ६ गोल गरिसकेका टोलीका सर्वकालीन उच्च गोलकर्तालाई इक्वेडर फुटबल महासङ्घले विशेष धन्यवाद ज्ञापन गरेको छ ।
विश्वकपका किंवदन्ती मानिने मेक्सिकोका ४१ वर्षीय गोलकिपर गुइलेर्मो ओचोआले चेकियाविरुद्ध १२ मिनेट मैदान बिताउँदै आफ्नो करियर समाप्त गरे । मेक्सिकन प्रशिक्षक हाभियर अगुइरेले ओचोआलाई विश्वस्तरीय लेजन्ड भन्दै प्रशंसा गरे ।
आफ्नो पहिलो र अन्तिम विश्वकप खेलेका अस्ट्रियाका ३७ वर्षीय स्ट्राइकर मार्को अर्नौटोभिचले स्पेनसँग ३–० ले पराजित भएपछि भावुक हुँदै संन्यासको घोषणा गरे भने बेल्जियमसँगको पराजयपछि सेनेगलका ३४ वर्षीय स्टार सादियो मानेले पनि देशका लागि सर्वस्व सुम्पिएको वक्तव्य जारी गर्दै संन्यास लिए
यसैगरी, समूह चरणबाटै बाहिरिएपछि चेकियाका ३० वर्षीय स्ट्राइकर प्याट्रिक सिक, ८४ क्याप जितेका स्कटल्यान्डका ४३ वर्षीय गोलकिपर क्रेग गोर्डन र ११ वर्षसम्म राष्ट्रिय टोलीबाट खेलेका कोटे डिभोयर (आइभोरी कोस्ट) का ३५ वर्षीय मध्यपङ्क्तिका खेलाडी ज्या-मिचेल सेरीले पनि अन्तर्राष्ट्रिय फुटबलबाट संन्यास लिएका छन् ।
