१० साउन २०८३, आइतबार
नेपाली कांग्रेस कोशी प्रदेश संसदीय दलका नेता उद्धव थापाले नयाँ मुख्यमन्त्रीको टुङ्गो लागेपछि मात्र कांग्रेसका मन्त्रीले राजीनामा दिने बताएका छन् ।
शनिबार मात्रै नेकपा (एमाले) र नेपाली कम्युनिस्ट पार्टीबीच प्रदेश सरकार सञ्चालनका लागि सहमति भएको थियो । हाल कोशीमा कांग्रेस र एमालेको सत्ता सहकार्य छ ।
नेता थापाले कांग्रेसका तर्फबाट सरकारमा सहभागी मन्त्रीले आजै राजीनामा दिने कुनै योजना नरहेको जानकारी दिए । ‘अब मुख्यमन्त्री को बन्छ, त्यो निर्णय भएपछि मात्र हाम्रा मन्त्रीज्यूहरूले राजीनामा दिनुहुन्छ,’ उनले भने ।
कांग्रेस सभापति गगनकुमार थापाले आइतबार नै आफ्ना मुख्यमन्त्री र प्रदेशका सभापतिलाई छलफलमा बोलाएका छन् । यो छलफलपछि मन्त्रीहरूले राजीनामा दिने नेताहरूले बताएका छन् ।
शनिबार भएको सहमति अनुसार एमालेले कोशी, बागमती र लुम्बिनी तथा नेकपाले कर्णाली र सुदूरपश्चिम सरकारको नेतृत्व गर्ने तय भएको छ । बाँकी रहेका प्रदेशमा अन्य दलसँग पनि छलफल गर्नेगरी तयारी भएको छ ।
कोशीको मुख्यमन्त्रीमा भने एमालेका तिलकुमार मेयाङबो मुख्यमन्त्री बन्ने चर्चा चलेको छ ।
हाल कोशीमा एमालेका हिक्मतकुमार कार्की मुख्यमन्त्री छन् ।
