पोखरा र आसपासका शिवालयमा पनि दर्शनार्थीको भीड [फोटो]

पोखरा – महाशिवरात्रिको अवसरमा पोखरा र आसपास क्षेत्रमा रहेका शिव मन्दिरहरूमा दर्शनार्थीको भीड लागेको छ । महाशिवरात्रि पर्वका अवसरमा सोमवार बिहानैदेखि पोखरा र आसपासका शिव मन्दिरमा दर्शनार्थीको भीड लागेको हो । 

विशेषरी वैदिक सनातन हिन्दू धर्मावलम्बी आजको दिन बिहानैदेखि नदी, कुण्ड र तलाउमा स्नान गरी शिवालयमा पुगेर श्रद्धाभक्ति पूर्वक पूजा–आराधना गर्दै भगवान् शिवलाई जल तथा गाईको दूध चढाउने गर्दछन् ।

आज बिहानैदेखि पोखरा र आसपासका केदारेश्वर मणि महादेव, गुप्तेश्वर महादेव, विन्ध्यबासिनीस्थित महादेव, पुष्करेश्वर महादेव, नर्मदेश्वर महादेव, भरतपोखरीको सिलेङ्गेस्थित सिद्देश्वर महादेव, मनियलडाँडाका पशुपतिनाथ, धारपानी र मालागिरीस्थित शिव मन्दिरलगायतका तीर्थस्थलमा बिहानैदेखि दर्शनार्थी जल र गाईको दूध चढाउन लामबद्ध छन् । 

महाशिवरात्रिको पावन अवसरमा मन्दिर व्यवस्थापन समितिले विशेष पूजाका साथै रुद्री लगायतका अनुष्ठानको आयोजना गरेका छन् । यसैक्रममा जलेश्वर महादेव मन्दिर ठूली पोखरीमा मन्दिर व्यवस्थापन समितिले महारुद्रीको आयोजना गरेको ठूलिपोखरी संरक्षण समितिका सचिव सविन जिसीले बताए ।

यसैगरी गोस्तेघाट क्षेत्रमा रहेको सर्वेश्वर शिवालय र सुरथेश्वर शिवालयमा पनि समितिको तर्फबाट विशेष पूजा लगाइएको छ भने काउरेको प्रसिद्ध अमरेश्वर शिवालयमा भजन प्रतियोगिताको आयोजना गरिएको मन्दिर व्यवस्थापन समितिले जनाएको छ ।

व्रतमध्ये सर्वोत्कृष्ट मानिने महाशिवरात्रिका दिन भक्तजन व्रत बस्दै भगवान् शिवको प्रिय वस्तु दूध, धतुरो र बेलपत्र चढाउने प्रचलन छ । आजको दिन विभिन्न सार्वजनिक चोक र मठमन्दिरमा काठका मुढा बालेर धुनी जगाई भजनकीर्तन गर्ने प्रचलन छ ।

महाशिवरात्रिको अवसरमा ध्वनी सहित उखु पड्काउनका लागि पोखरामा उखु समेत ठूलो परिमाणमा भित्रिएको छ । मन्दिर छेउछाउ तथा बजारका विभिन्न स्थानमा उखु बिक्रीका लागि राखेको देख्न सकिन्छ ।