काठमाडौं – आसन्न लोकसभा निर्वाचनका लागि भारतीय कांग्रेस पार्टीले मंगलवार घोषणापत्र सार्वजनिक गरेको छ । 

घोषणापत्र सार्वजनिक गर्दै कांग्रेस अध्यक्ष राहुल गान्धीले यसलाई बन्द कोठामा नबनाइएको र यसले देशका जनताको भावनालाई प्रतिनिधित्व गर्ने बताए । 

घोषणापत्रका प्रमुख कुरा यस्ता छन् : 

न्यूनतम आयको प्रत्याभूति
कांग्रेसले न्यूनतम आय योजना कार्यान्वयन गरेर गरीबी निवारण गर्ने प्रतिबद्धता जनाएको छ । यस योजनाअन्तर्गत वर्षको ७२ हजार भारु सबभन्दा गरीब २० प्रतिशत घरपरिवारलाई दिइनेछ । सम्भव भएसम्म परिवारकी महिलालाई उक्त रकम दिइनेछ । 

रोजगारी क्रान्ति
भारतका युवाका लागि कांग्रेसले सरकारी र निजी दुवै क्षेत्रमा रोजगारीको प्रतिज्ञा गरेको छ । पार्टीले निर्वाचित भएमा सार्वजनिक क्षेत्रमा ३४ लाखवटा नयाँ जागिरको प्रतिज्ञा गरेको छ अनि मार्च २०२० सम्म केन्द्रीय सरकारका ४ लाख रिक्त पदपूर्ति गर्ने बताएको छ । उसले राज्य सरकारलाई रिक्त २० लाख पद भर्न विश्वस्त तुल्याउने र प्रत्येक ग्राम पञ्चायत तथा नगरपालिकामा १० लाख नयाँ सेवा मित्र रोजगारी सिर्जना गर्ने भनेको छ । 

कृषक तथा मजदूर
कांग्रेसले कृषकहरूका लागि कर्जमाफी हुँदै कर्जमुक्तिको प्रतिज्ञा गरेको छ । घोषणापत्रले बेग्लै किसान बजेट प्रत्येक वर्ष प्रस्तुत गर्ने भनेको छ । स्थायी कृषक विकास र योजनासम्बन्धी राष्ट्रिय आयोग बनाउने प्रतिज्ञा पनि कांग्रेसले गरेको छ । 

सबैका लागि स्वास्थ्यसेवा
कांग्रेसले स्वास्थ्य सेवा अधिकार ऐन बनाउने र सबै नागरिकका लागि निःशुल्क स्वास्थ्यजाँच, बहिंरग सेवा, निःशुल्क औषधि र अस्पताल भर्नाको प्रत्याभूति दिने बताएको छ । कुल गार्हस्थ्य उत्पादनको ३ प्रतिशत खर्च गर्ने गरी स्वास्थ्य सेवामा अहिलेको भन्दा दुईगुणा बढी खर्च गरिने कांग्रेसको प्रतिज्ञा छ । 

जीएसटी २.०
कांग्रेसले जीएसटीलाई सरल बनाएर मध्यम दरको कर, निर्यातमा शून्य रेटिङ र अत्यावश्यक सामान तथा सेवामा करछुटको प्रतिज्ञा गरेको छ । 

सबै बालबालिकाका लागि गुणस्तरीय शिक्षा
कांग्रेसले कक्षा १ देखि १२ सम्म शिक्षा अनिवार्य तथा निःशुल्क गराउने बताएको छ । शिक्षाका लागि सन् २०२३–२४ सम्ममा कुल गार्हस्थ्य उत्पादनको ६ प्रतिशत रकम छुट्ट्याइने उसको प्रतिज्ञा छ । 

लैंगिक न्याय
कांग्रेसले महिलाका लागि लोकसभा र विधानसभामा ३३ प्रतिशतको आरक्षणको व्यवस्था गर्ने महिला आरक्षण विधेयक पारित गर्ने प्रतिज्ञा गरेको छ ।  अनि केन्द्रीय सरकारी जागिरमा महिलाका लागि ३३ प्रतिशत कोटा छुट्ट्याउने पनि भनेको छ । 

घरको अधिकार 
कांग्रेसले घरको अधिकार ऐन ल्याएर घरवारविहीन सबै गाउँले घरपरिवारका लागि जमीन उपलब्ध गराउने प्रतिज्ञा गरेको छ । 

कांग्रेसले आदिवासी, सैनिक, वातावरण तथा जलवायु परिवर्तन, ठूला शहर तथा शहरी सुशासन, घृणा अपराधको अन्त्य लगायतका विषयमा पनि प्रतिज्ञा गरेको छ । 

हिन्दुस्तान टाइम्सबाट