काठमाडौं – कम्प्यूटर लगायतका मेसिन र प्रविधिले खासै त्रुटि गर्दैनन् भन्ने विश्वास गरिन्छ । तर ललितपुरको एकान्तकुनास्थित यातायात व्यवस्था कार्यालयको कम्प्यूटरले भने उल्टो देखाउने गरेको छ ।

चालक अनुमतिपत्र (लाइसेन्स) नविकरण गर्न आउनेको ‘ट्रायल फेल’ देखिने र ट्रायल फेल भएकाहरूको नतिजा कम्प्यूटरमा पास देखिने गरेको पाइएको छ । हाल कोटेश्वर बस्दै आएका गुल्मीको स्मा गाउँपालिका–७ का नारायण घर्ती ३ पटक लाइसेन्स ट्रायलमा फेल भए ।

तर कार्यालयमा आउँदा कम्प्युटर डाटाले उनलाई पास भएको देखायो । ‘लाइसेन्स पास भएको देखिएपछि लाइसेन्स लिने प्रक्रिया अगाडि बढाउँदा कर्मचारीहरूले ढड्डामा फेल भएको भनेका छन् । २ दिन आइसकें काम भएको छैन । यो २ नम्बर टेबुलमा २ घण्टादेखि कर्मचारी नै छैनन् । अब भोलि आउनुपर्ला,’ नारायण घर्तीले भने ।

नुवाकोटको बिदुर–९ का ठाकुर तिमिल्सिनाले २०६५ माघ ११ गते लाइसेन्स लिएका हुन् । उनको लाइसेन्सको म्याद २०७५ माघ ११ गते सकिएको छ । उनी लाइसेन्स नविकरणको लागि यातायात व्यवस्था कार्यालय आउँदा कम्प्यूटरले उनलाई फेल भएको देखायो ।

वास्तविकताभन्दा कम्प्यूटरमा फरक नतिजा देखाउने समस्या दिनहुँ सेवाग्राहीलाई आउने गरेको छ । समस्याले कार्यालय र सेवाग्राही दुवैलाई अप्ठ्यारो पारिरहेको छ । ‘दिनकै ५–६ सय जनाको काम गर्दा केहीको हकमा त्यस्तो समस्या देखिने गर्छ । त्यस्तो समस्यामा हामीले सबै सक्कल कागजात हेरेर कार्यालय प्रमुखको निर्णयबाट समाधान गर्ने गर्छौं । यो हामीले जानीजानी गरेको गल्ती होइन, फेल भएकोलाई पास र पास भएकालाई फेल गर्ने त कुरा हुँदैन । धेरै काम गर्दा केही अन्जानवश गल्ती हुन्छ,’ कार्यालयका शाखा अधिकृत डम्बरबहादुर चन्दले भने ।