खस्यौली – रुपन्देहीको बुटवलस्थित आन्तरिक राजस्व कार्यालयबाट व्यक्तिगत स्थायी लेखा नम्बर (प्यान) लिनेको संख्या बढ्दै गएको छ ।

हालसम्म कूल ६० हजार ३५२ जनाले व्यक्तिगत स्थायी लेखा नम्बर (प्यान) लिएको कार्यालयले जनाएको छ । प्यान लिने संख्यामध्ये चालू आर्थिक वर्षको २०७६/०७७ को कात्तिक १५ गतेसम्म झण्डै ७ महिनाको अवधिमा २८ हजार ६८४ जनाले व्यक्तिगत स्थायी लेखा नम्बर ९प्यान० लिएको आन्तरिक राजस्व कार्यालय बुटवलका प्रमुख कर अधिकृत अर्जुन ढकालले जानकारी दिए ।

व्यक्तिगत स्थायी लेखा नम्बर (प्यान) लिनेमा अधिकांश सरकारी कर्मचारी भएको बताइएको छ । विक्रम संवत् २०७६ असार मसान्तसम्म व्यक्तिगत स्थायी लेखा नम्बर (प्यान) लिनेको संख्या ३१ हजार ६६८ रहेको छ ।

‘सरकारले यसलाई व्यवस्थापन गर्न खोजेकाले पनि प्यान अनिवार्य भएको छ,’ उनले भने । व्यावसायिक स्थायी लेखा नम्बर (प्यान) लिनेको संख्या पनि बढ्दै गएको छ । 

हालसम्म ५२ हजार २३२ ले व्यावसायिक प्रयोजनका लागि स्थायी लेखा नम्बर (प्यान) लिएका छन् । उक्त संख्यामध्ये चालू आव २०७६/०७७ को कात्तिक १५ गतेसम्म ४ हजार ९९२ जनाले व्यावसायिक प्यान लिएका छन् । विक्रम संवत् २०७६ असार मसान्तसम्म ४७ हजार २४० जनाले व्यावसायिक प्रयोजनका लागि स्थायी लेखा नम्बर लिएका छन् । 

मूल्यअभिवृद्धि कर (भ्याट) मा हालसम्म ८ हजार ६३९ जनाले दर्ता गराएका छन् भने विक्रम संवत् २०७६ कात्तिक १५ सम्म १ हजार २७० जनाले दर्ता गराएका छन् । हालसम्म भ्याटमा दर्ता गराउनेको संख्या ७ हजार ३६९ रहेको छ ।

स्थायी लेखा नम्बर (प्यान) आयकर, मूल्यअभिवृद्धि कर एवं अन्तशुल्क सम्बन्धी सबै कारोबारको लागि प्रयोग हुने बताइएको छ ।