नेपाल कम्युनिस्ट पार्टी नेकपाका उपाध्यक्ष वामदेव गौतमले मंसिर १४ गते हुने उपनिर्वाचनमा देशभर नेकपाले जित्ने दाबी गरेका छन् ।

विकास र समृद्धिको नेतृत्व नेकपाले गर्ने भन्दै उनले सूर्य चिह्नमा मतदान गर्न आग्रह समेत गरे ।

भक्तपुर निर्वाचन क्षेत्र नम्बर २ को (ख) मा हुन गइरहेको प्रदेशसभा निर्वाचनमा नेकपाका उम्मेदवार डीपी ढकालको चुनावी घरदैलो कार्यक्रमलाई चाँगुनारायण नगरपालिका वडा नम्बर ७ मा सम्बोधन गर्दै नेता गौतमले समृद्धिको नेतृत्व नेकपाले गर्ने बताएका हुन् । 

‘देशभर नेकपाले चुनाव जित्दैछ, भक्तपुरमा विकास र समृद्धिको कुरा नेकपाले पूरा गर्छ,’ गौतमले भने, ‘डीपी ढकाललई भोट दिएर जिताउने जिम्मा तपाईंहरूको, उहाँले अगाडि सारेका योजना पूरा गर्ने जिम्मा नेकपाको ।’

प्रतिनिधि सभाका सांसद महेश बस्नेत र प्रदेश सभामा जितेर गएपछि डीपी ढकाल समेत मिलेर यस निर्वाचन क्षेत्रलाई नमूना बनाउने विश्वास गौतमले लिए ।

कात्तिक २१ गते ढकालको उम्मेदवारी मनोनयनमा पनि गौतम उपस्थित भएर भक्तपुरमा नेकपाको जित सुनिश्चित भएको बताएका थिए ।