कानून, न्याय तथा संसदीय मामिला मन्त्रालय सुनसान छ । पुराना मन्त्री गए तर, नयाँ मन्त्री कार्यभार सम्हाल्न आइपुगेका छैनन् ।

प्रधानमन्त्री केपी शर्मा ओलीले मन्त्रिमण्डल पुनर्गठन गर्दा उपप्रधान एवं स्वास्थ्य मन्त्री रहेका समाजवादी पार्टीका केन्द्रीय कार्यसमिति अध्यक्ष उपेन्द्र यादवलाई कानून मन्त्रालयको जिम्मेवारी दिए ।

तत्कालीन कानून मन्त्री भानुभक्त ढकालले यादवको ठाउँमा स्वास्थ्य मन्त्रालय पुगेर कार्यभार सम्हालिसकेका छन् ।

मन्त्रीमण्डल पुनर्गठन गरेको ४ दिन बितिसक्यो, तर यादव भने कार्यभार सम्हाल्न मन्त्रालय आएका छैनन् ।

प्रधानमन्त्री ओलीले मन्त्रिपरिषद् पुनर्गठन गरेकै दिन सबै मन्त्रीले शपथ सकेलगत्तै मन्त्रालयमा पुगेर कार्यभार सम्हालेका थिए ।

यादव भारत भ्रमणका क्रममा रहेकाले त्यो दिन उपस्थित भएनन् । अहिले भारतबाट फर्किसके पनि उनी मन्त्रालय गएका छैनन् ।

यादव पार्टीका संघीय परिषद् अध्यक्ष डा. बाबुराम भट्टराईसँगै चुनाव प्रचारका लागि आइतवार पोखरा पुगेका छन् ।

मन्त्रीहरू फेरिएको दिन कानून मन्त्रालयमा उपेन्द्रको नेम प्लेट कागजको राखिएको थियो, अहिले भने यादवको परिचय खुल्ने गरी व्यवस्थित नेम प्लेट राखिएको छ ।

कर्मचारीहरू नयाँ मन्त्रीलाई स्वागत गर्ने प्रतिक्षामा छन्, तर यादव आउने/नआउने पत्तो छैन ।

समाजवादी पार्टीमा सरकार छाड्नुपर्ने मत पनि बलियो बन्दै गएको छ ।

पार्टी अध्यक्ष देशबाहिर रहेको बेला मन्त्रिमण्डल हेरफेर हुनु र मन्त्रालय फेरिनुलाई पार्टीका नेताहरूले अपमानका रूपमा बुझेका छन् ।

यादवले मन्त्रालय आउँछु भनेर खबर भने गरेको कर्मचारीहरू बताउँछन् ।

‘सचिवज्यूसँग सम्पर्क हुँदा आज खबर गर्छु भन्नुभएको रहेछ, तर उहाँ आउनुभएको छैन,’ मन्त्रालयका सूचना अधिकारी कमलराज गौतमले लोकान्तरसँग भने ।