पोखरा- पोखरा रङ्गशाला फुटबल मैदानमा महिला फुुटबल टोलीले आइतवार ‘ओपनिङ टच’  गरेको छ । १३औं साग अन्तर्गतको महिला फुटबल प्रतियोगिता यही मंसिर १७ देखि हुँदैछ ।

फुटबल मैदानको काम केही बाँकी भए पनि प्यारापिट लगायतका काम शनिवार सकिएको थियो । मैदान बाहिरको सिन्थेटिक एथ्लेटिक ट्रयाक वरिपरि काम भइरहेको छ । माछापुच्छ्रे हिमालको काखमा सिङ्गारिएको नवनिर्मित फुटबल मैदानमा नेपाली महिला फुटबल टोलीले ‘ओपनिङ टच’ गरेका हुन् । 

प्रशिक्षक हरि खड्काले पोखराको सुन्दरतासँग खेलाडीले निकै आनन्द महसूस गरेको बताउँदै भने, 'फुटबल मैदानको केही काम निर्माण हुँदैछन् । यो खुलेको हिमाल मुनि ‘ओपनिङ टच’ले खेलाडीमा आत्मविश्वास बढाएको छ ।' सागका अघिल्ला संस्करणमा नेपाल भारतसँग पराजित भएको थियो । घरेलु मैदानमा अघिल्ला खेलको बदला लिएर जित हासिल पार्ने दाउमा खेलाडी छन् ।  

खड्काले यसपालि खेलाडीले निकै मेहनत गरेकाले जित्नेमा ढुक्क भएको बताए । 'नेपालसँग भिड्ने भारत पनि बलियो प्रतिद्वन्द्वी नभएकाले हाम्रो मेहनतले सोचेजस्तै सफलता हासिल गर्नेमा ढुक्क छौं,' उनले भने, 'भारतीय र नेपाली टोलीको स्तर एउटै हो । अहिले साफ च्याम्पियनसिपदेखिको परिश्रमलाई उपयोग गरेर उपाधि जित्न चाहन्छौं ।'

टोलीका लागि स्ट्राइकरको जिम्मेवारी सम्हालेका सावित्रा भण्डारीले पनि मेहनत राम्रो गरेकाले खेल जित्ने विश्वास व्यक्त गरिन् । 'अघिल्ला खेलमा देखिएका गल्ती यो खेलमा दोहोरिने छैनन्, सुधारले नतिजा राम्रै हुनेमा आशावादी छौं ।' घरेलु मैदानको फाइदा उठाउँदै नेपालीलाई खुशी दिलाउन आफूहरूले निकै मेहनत गरेको उनको भनाइ छ ।  

साग महिला फुटबलको पहिलो खेलमा नेपालले श्रीलङ्कासँग भिड्ने छ । प्रतियोगितामा नेपालसहित भारत, श्रीलङ्का र माल्दिभ्स गरी चार देशमात्रै सहभागी भएकाले राउन्ड रोबिन लिगका आधारमा खेल हुने फुटबल प्रशिक्षक शम्भु केसीले जानकारी दिए । -जमुना वर्षा शर्मा/रासस