कार्यकारी अध्यक्ष बनेपछि बढ्यो प्रचण्डको सक्रियता, नेता नेपाललाई खुमलटारमै बोलाएर छलफल

सत्तारूढ दल नेपाल कम्युनिस्ट पार्टी (नेकपा)को सचिवालय बैठक सोमवार बस्ने भएको छ ।

उपनिर्वाचनको समीक्षा, पार्टी एकीकरणको बाँकी काम लगायतका एजेण्डासहित बैठक बस्न लागेको एक सचिवालय सदस्यले बताए ।


Advertisement

सचिवालय बैठकमा उठाउने एजेण्डाका बारेमा आइतवार अध्यक्ष पुष्पकमल दाहाल 'प्रचण्ड' र वरिष्ठ नेता माधवकुमार नेपालको प्रचण्डनिवास खुमलटारमा भेटवार्ता भएको थियो ।

नेता नेपाल बिहान खुमलटार पुगेका थिए ।


Advertisement

दुई नेताबीचको भेटघाटमा केन्द्रीय र स्थायी कमिटी बैठक बोलाउने विषयमा पनि छलफल भएको स्रोतले दाबी गर्यो ।

मूलभूत रूपमा एकीकरण प्रक्रिया टुंगिएको भएपनि नेकपामा ३२ विभाग र ५ निकायले पूर्णता पाउन बाँकी छ ।

पार्टीको कार्यकारी अधिकार प्राप्त गरेपछि अध्यक्ष प्रचण्डले अन्य नेताहरूसँगको भेटघाट तीव्र पारेका छन् । शनिवार बिहान अध्यक्ष तथा प्रधानमन्त्री ओलीलाई भेट्न बालुवाटार पुगेका थिए ।

'भेटघाट निकै छोटो थियो,' बालुवाटार स्रोतले लोकान्तरसँग भन्यो, 'धेरै कुराकानी हुन पाएन । छोटो भेटघाटमा सचिवालय बैठक बोलाउनेसम्बन्धी कुराकानी भयो ।'

यसअघि प्रधानमन्त्री ओली उपचारका लागि अस्पतालमै रहेको बेला बुधवार प्रचण्डको अध्यक्षतामा सचिवालय बैठक बसेको थियो । बैठकले उपनिर्वाचनको समीक्षाका लागि पार्टीका सम्बन्धित कमिटीहरूबाट रिपोर्ट माग गर्ने निर्णय गरेको थियो ।

बैठकको निर्णय सार्वजनिक गर्दै प्रवक्ता नारायणकाजी श्रेष्ठले २३ गते बस्ने बैठकले उपनिर्वाचनको समीक्षा गर्ने बताएका थिए ।

 

 

 

 

 

कमेन्ट गर्नुहोस्