प्रदेश नम्बर ५ को हिउँदे अधिवेशन आइतबारबाट शुरू भएको छ ।

यो अधिवेशनले प्रदेशको स्थायी राजधानी र नामकरण टुंगो लगाउने अपेक्षा गरिएको छ । विधयेक अधिवेशनका रूपमा लिइने हिउँदे अधिवेशनले प्रदेशको स्थायी राजधानी र नामकरण टुंगो लगाउनुपर्ने दबाब छ । 

प्रदेशको राजधानी र नामकारण टुंगो लगाउन दबाबमा रहेको प्रदेश सभाको पहिलो दिनकै बैठकमा सांसदहरूले यही विषयलाई उठान गरे ।

बैठकमा बोल्दै नेपाली कांग्रेस सचेतक निर्मला क्षेत्रीले हिउँदे अधिवेशनबाटै प्रदेशको स्थायी राजधानी र नामको टुंगो लगाउन आग्रह गरिन् । 

उनले भनिन्, ‘सबै कुरामा अब्बल प्रदेशले अब नामकारण र राजधानीको टुंगो लगाउने विषयमा ढिलाइ गर्न हुँदैन, यही अधिवेशनले टुंगो लगाएर अगाडि बढनुपर्छ ।’ 

नेकपा प्रमुख प्रमुख सचेतक भूमिश्वर ढकालले राजधानी र नामकरण टुंगो लगाउन प्रदेश सभामा गठन भएको विषेश समितिले पेश गरेको प्रतिवेदनलाई व्यापक छलफल गरी सोही प्रतिवेदनका आधारमा राजधानी र नामकरणको विषय टुंग्याइनुपर्ने बताए । 

‘उपसमितिले बैठकमा प्रतिवेदन प्रस्तुत गर्छ, त्यसमा सबै राजनीतिक दलहरूबीच छलफल गरी प्रदेशसभाभित्रैको छलफलबाट यो विषय टुंगो लगाउँछौं,’ प्रमुख सचेतक ढकालले भने । 

उनले प्रदेशलाई समृद्ध बनाउन सबै जुटनुपर्ने बताए । 

नेकपामा अर्का सांसद दिपेश थारूले पनि स्थायी राजधानी र नामकरणको विषयलाई टुंग्याउन माग गरे ।

उनले हिउँदे वर्षाका कारण कृषि बालीमा धेरै क्षति पुगेकाले त्यसतर्फ सरकारको ध्यान जानुपर्ने पनि बताए । 

समाजवादी पार्टीका सांसद सन्तोष कुमार पाण्डेयले आमाको नामबाट नागरिकता पाउने व्यवस्था भएपनि कार्यान्वनमा समस्या भएको भन्दै त्यसतर्फ सरकारको ध्यान जानुपर्ने बताए । 

बैठकमा राष्ट्रिय जनमोर्चाकी सांसद तारा जिसीले पनि बोलेकी थिइन् । 

प्रदेश सभाको अर्को बैठक यही माघ १२ गते बस्नेछ ।