काठमाडौं – भदौ १५ देखि प्रदर्शनमा आउने चलचित्र 'मेरी मामु'को टोलीले यतिबेला पूर्वका विभिन्न स्कूलहरूमा चलचित्रको प्रमोशन गरिरहेको छ ।

यसअघि काठमाडौंका दर्जनभन्दा बढी स्कूलमा पुगेर चलचित्रको प्रमोशन गरेको थियो ।

अहिले निर्माता सन्तोष सेन, कलाकार आयुव केसी र कुसुम गुरुङ प्रमोशनमा हिँडेका छन् भने अब बुटवलमा पुगेर अर्का कलाकार क्रिजन गौतम र अश्लेषा ठकुरी जोडिनेछन् ।

'मेरी मामु'को खासगरि विद्यालयकेन्द्रित रहेर प्रमोशन गरिएको छ । बुटवल र आसपासका क्षेत्रमा रहेका दुई दर्जन विद्यालयमा चलचित्रको प्रमोशन गरिने निर्माता सन्तोष सेनले बताए ।

पूर्वको धरान, बिर्तामोडका विभिन्न स्कूलमा प्रमोशन गरेको निर्माण टीम अब एकहप्ता पश्चिम क्षेत्रमा प्रमोशन गर्ने बताइएको छ ।

सन्तोष सेन निर्मित चलचित्र 'मेरी मामु'लाई यम थापाले लेखन तथा निर्देशन गरेका छन् भने आयुव र कुसुमका अलावा अश्लेषा ठकुरी, सारुक ताम्राकार, क्रिजन गौतम आदिको अभिनय छ ।

देशको चर्चित फिल्म ब्यानर आशुसेन फिल्म्सले यसपूर्व प्रेमगीत र प्रेमगीत- २ जस्ता सफल चलचित्रहरू निर्माण गरेको छ । 

प्रमोशनका क्रममा चलचित्रबारे विद्यार्थी, अभिभावकलाई जानकारी दिनुका साथै थाइल्यान्ड टूरबारे जानकारी गराइएको छ ।